DILI, STLTIMORLESTE.com – Haree ba realidade iha rai laran, povu sira neebe hela iha area remotas labele asesu diak ba saude bainhira sira hetan moras, tanba problema barak neebe sira hasoru mak distansia dok husi sentru saude sira, dalan no pesoal saude neebe menus.
Estudante UNTL, departamentu Infermeira, Lala Borges hatete, povu sira iha area remotas nee presiza mos asesu ba servisu saude espesializada nian. Tanba problema transporte, distansia no estrada halo sira labele asesu ba sentru saude hodi koko sira nia moras. Tanba nee liu husi Ministeriu Saude (MS) presiza hametin asesu servisu saude espesializada ba komunidade sira iha area remotas. Atu nunee bele tulun, deteta sedu no trata moras sira neebe presiza kuidadu mediku espesializada.
“Ita haree problema barak mak ita nia povu kiik sira iha area remotas hasoru, hodi nunee sira labele mai halo konsulta hodi deteta sira nia moras. Neebe liu husi hametin asesu ba servisu saude espesializada ba komunidade sira iha area remotas nee, presiza tebes hodi tulun deteta sedu no trata moras sira neebe presiza kuidadu mediku espesializada,” dehan nia ba STL iha Liceu, Sesta (17/07/206).
Nia hatete, povu sira iha area remotas nee atu hasoru deit infermeira sira mos susar, satan mediku espesilista sira. Tanba nee mak sira labele hatene tuir sira nia moras, hodi husik deit iha uma too moras makas mak familia foin deside lori ba ospital. Neebe liu husi hametin asesu servisu saude espesializada ba komunidade nee importante, para bele deteta moras no kuidadu mediku.
Nia katak, servisu nee halao ona husi Servisu Saude Munisipiu balun ba iha komunidade rural sira. Tanba servisu nee lori benefisiu diak ba povu, husu ba MS atu labele halao deit iha munisipiu ida rua mak halao hotu ba povu iha rai laran.
Nunee mos infermeira Carolina Santos hatete, povu iha rural presiza tebes saude nia pezensa iha sira hotu nia leet. Tanba situasaun barak mak parte MS seidauk bele rezolve hotu, maibe iha servisu balun mak lao dadauk ona. Hanesan iha munisipiu balun, fatin neebe komunidade iha rurais labele asesu ba saude espesializada dadaun nee sira halo konsultasaun espesializada neebe lidera husi mediku espesialista hodi fo atendimentu saude ba komunidade sira iha area remotas.
Entretantu iha sorin seluk, tuir informasaun neebe STL asesu iha dia 15 Julhu 2026, Sentru Saude Ossu halao atividade konsultasaun espesializada neebe lidera husi mediku espesialista hodi fo atendimentu saude ba komunidade sira iha Postu Administrativu Ossu, Munisípiu Viqueque.
Atividade nee nuudar parte husi esforsu MS atu hametin asesu ba servisu saude espesializada ba komunidade sira iha area remota, hodi tulun deteta sedu no trata moras sira neebe presiza kuidadu mediku espesializada.
Durante konsultasaun nee, mediku espesialista sira halo ezaminasaun, konsultasaun no fo tratamentu tuir kondisaun saude pasiente ida-idak, no mos fo edukasaun kona-ba prevensaun moras no importansia halo kontrolu saude regular.
Servisu Saude Munisípiu Viqueque no Sentru Saude Ossu reafirma nia kompromisu atu kontinua melhora kualidade servisu saude no garante katak komunidade hotu-hotu bele asesu ba atendimentu saude neebe diak, seguru no inkluzivu.
(dom)
