DILI, STLTIMORLESTE.com – Povu kiik sira iha area rurais neebe hela dok husi postu no munisipiu, balun asesu ona eletrisidade no balun neebe seidauk asesu, hakmatek falun ho triste sira kontinua buka akompanha tuir maktoban Antigu Prezidente Republika Fransisco Guterres Lu Olo nia isin neebe tau iha rezidensia Farol liu husi informasaun neebe publika husi media nasional no internasional iha televizaun, radio no media sosial sira.
Sira labele hakat mai simu maktoban nia isin neebe lori husi Malazia mai iha Aeroportu Dili, hanesan sidadaun no maluk Timor oan sira seluk neebe hela iha Kapital Dili, no labele ba iha Rezidensia Farol, tanba kestaun dalan no transporte neebe sira susar atu asesu. Nunee sira nafatin hakmatek no laran triste hodi akompanha deit liu husi media neebe fo sai husi televizaun no radio. Sira neebe laiha televizaun rona deit husi radio, no sira neebe kaer telefone android asesu husi media sosial. Sira neebe laiha eletrisidade buka meius ba cas iha maluk seluk nia uma nebe uza tenaga surya, hodi nunee bele akompanha nafatin informasaun kona ba Maktoban Avo Luolo nian.
Sidadaun Atsabe, Aluci neebe hela iha Suku Tiarlelo hatete, nuudar povu iha nasaun ida nee senti laran triste tebes, derpenti hare no rona informasaun neebe fo sai husi media sira no media sosial katak Nai Antigu Prezidenti da Republika Avo Lu Olo husik ona mundu nee. Nudar Timor oan no jerasaun foun ba nasaun ida nee senti triste tebes, tanba lakon lider neebe laran diak no ema neebe simplisidade.
Iha nee eletrisidade tama ona, maibe lakan mak lalos, bainhira la lakan uma kain balun uza hela tenaga surya. Neebe bainhira la lakan, ami sira ahi laiha nee lori telfone no radio oan sira ba cas iha sira nia uma, para ami nia telfone lakan no radio sira bele lian. Husi neemak ami hotu iha nee bele asesu no akompana nafatin informasaun kona ba Avo Lu Olo nia mate isin iha Dili. Neebe maske ami iha rurais, ho kondisaun eletrisidade neebe lakan lalos, maibe ami nafatin buka maneiras hodi akompana Avo Lu Olo nia mate isin neebe hatoba hela iha rezidensia nee. Maske haree deit husi telfone no rona husi radio, maibe sentimentu triste nee halo ami tanis hotu, dehan nia ba STL via WA, Kuarta (24/06/2026).
Nia katak, komunidade sira iha nee liu-liu ba katuas sira mak sempre mantein iha radio oin hodi akompana no rona tuir informasaun husi radio. Sira neebe iha telfone, bainhira batria mate buka meios hodi ba cas fali iha maluk neebe uza tenaga surya no jerador hodi halakan sira nia telfone. Nuudar Timor oan, povu hotu senti triste lakon nia lider no aman nasaun ida nee nian neebe mak luta tinan barak hodi liberta rai ida nee no ohin loron ema hotu moris iha liberdade nia laran.
Nunee mos Komunidade Tiarlelo, Anjelina Santos katak, iha uma sira laiha televizaun nunee nia ho familia akompana deit husi telfone neebe fo sai husi media sosial sira. Nudar sidadaun iha nasaun doben ida nee senti triste tebes, hahu husi Segunda too ohin loron komunidade hotu iha nee hakmatek hodi akompana nafatin informasaun kona ba Avo Lu Olo nia mate nee. Balun kaer telfone ho laran triste, tanis no halerik ba telfone neebe sira kaer.
Hahu iha Segunda too ohin loron, ami komunidade sira iha fatin nee hot-hotu akompana informasaun kona ba Avo Lu Olo nia mate, barak mak liu husi telfone deit tanba maioria laiha televizaun. Neebe ami desaraska cas iha maluk neebe iha jerador no tenega surya, no ense deit pulsa ba telfone mak nonton lisuk,dehan nia.
Nia katak, sorte ohin loron moris iha era digital halo ema hotu bele asesu no haree informasaun hotu liu husi media sosial iha telfone deit, selae povu sira iha rurais liu-liu sira nee laiha tv no radio labele asesu situasaun importante hanesan nee.
Entretantu Onze Soares dehan, familia iha rurais nia Pae ho Mae akompana haree husi TV iha tempu kalan, maibe bainhira ahi mate sira rona deit husi radio. Maibe bainhira ahi mate sira buka meius hakbesik bá maluk neebe iha telfone hodi akompana nafatin informasaun kona bá Avo Lu Olo nia mate.
(dom)
