DILI, STLTIMORLESTE.com – Povu Timor Leste (TL) sente lakon aman estadista Saudozu Francisco Guterres Lu Olo neebe fila hikas ona iha Nai nia kadunan Santo rohan laek.
Lia hirak nee Membru Asembleia Konstituante, no Membru Parlamentu Nasional premeiru lejislatura, Adalsiza Ximenes ba STL iha Farol, Sesta (26/06/2026) hatete, nuudar povu sente triste tanba lakon aman estadista ida saudozu Francisco Guterres Lu Olo.
Feto Potensia nee haktuir, povu sei presiza saudozu atu hamutuk ho sira iha tinan barak tan hodi hadia rai no povu ida nee, maibe Maromak hadomi liu saudozu ohin husik hela nia povu no rai nee hodi fila hikas iha Nai nia kadunan Santo.
“Nia ema importante ida neebe mak tuir lo-loos ita sei presiza tan tinan balun ba oin ho nia kapasidade hanesan ema estadista ida, maibe planu Maromak nia oin seluk, ita hotu sente katak ita lakon ema importante ida ba ita nia nasaun, nia 24 anos iha ai laran, 24 anos iha vila hanesan ema estadista ida atu kontribui atu priense ita nia indepedensia,” katak nia.
Feto potensia nee hatete, Saudozu Lu Olo ema estadista ida neebe kontribui makaas iha luta, hodi lori rai ida nee ba hetan ukun rasik aan, maibe ho nia mate nee husik hela triste boot ba povu no nasaun tanba lakon nia ema diak ida. “Mate ida nee ita hanoin katak povu Timor sente lakon ema estadista ida,” dehan.
Nunee mos Xefe Suku Wailili Munisipiu Baucau, Hernani de Jesus Aroujo Ribeiro hatete, bainhira rona saudozu Lu Olo hakotu iis, notisia neebe halo nia sente lakon lider diak ida.
“Bainhira hau rona saudozu Prezidente Lu Olo mate halo ema hotu hakfodak, triste sente lakon ema diak ida iha ita nia rai Timor, no povu hotu hakarak mai partisipa prosesu funebre saudozu maibe ho kondisaun balun iha transporte balun laiha tanba nee balun deit mak mai,” katak nia.
Nia hatutan, nuudar Xefe Suku nia haree saudozu Lu Olo lider ida neebe nakonu ho domin pasiensia no hakruuk ba regra neebe konstituisaun haruka, nunka mais atu foti aan.
“Ba oin lider neebe ukun nasaun ida nee no kaer partidu nafatin tuir regra no estatutu neebe partidu iha nunee lori istoria partidu ba oin,” katak Xefe Suku.
Nia hatutan, saudozu Lu Olo ema ida neebe simples la foti aan, nuudar lider estadista hakruuk ba lei no regra sira.
Nunee mos membru CCF, hanesan mos koordenador Komisaun Politika Munisipiu Baucau, Abrao Gabriel do Santos Oliveira hatete, hahalok saudozu Lu Olo nian neebe halo nia labele haluha mak nia hatudu nia aan nuudar lideransa estadista ida neebe hakoak ema hotu.
“Nia hatudu nia aan hanesan ohin hau koalia, maske lider nee barak maibe lider hanesan saudozu estadista nee difisial tebes atu hetan, nia tau estadu nee aas liu hotu, ida nee mak halo ami labele haluha,” katak nia.
Nia hatete, nuudar koordenador membru Comite Central periodu dala rua ona liu tinan 10 ona maibe durante nee saudozu fo orientasaun ba sira nuudar lider no lider neebe tau estadu nee aas liu.
“Lider neebe tau estadu nee aas liu, neebe ami partense ba lideransa nee no ami ba servisu nee los ba estadu,” katak nia.
(eme)
