DILI, STLTIMORLESTE.com – Prezidente Republika (PR), Jose Ramos Horta kolabora ho IX Governu Konstitusional realiza eventu boot tolu iha tinan 2026, hodi hasae Perfil internasional Timor Leste nia.
Iha tinan ida nee Prezidensia Republika iha kolaborasaun ho IX Governu Konstitusional, lansa ofisialmente eventu estratejiku tolu ba tinan 2026 Maratona Internasional Díli, Simeira Siensia ba Dezenvolvimentu no Natal do Povo. Lansamentu nee halao iha Palasiu Prezidensial Nicolau Lobato, Bairo Pite, Sesta (08/05/2026).
“Hau koalia deit oituan kona-ba atividade iha fulan Agostu, nee mos laos premeiru ves, iha 2015 halo tiha ona atividade konvida mai TL premiu Nobel momentu neeba hanoin 13 mai,” dehan Prezidente Republika Jose Ramos Horta.
Eventu estratejiku tolu ba tinan 2026 reprezenta esforsu unifikadu ida husi Prezidensia no Governu atu hasae perfil internasional Timor Leste nian enkuantu fo benefísiu konkretu ba nia populasaun. Sira konstitui plataforma ida ba envolvimentu ho parseiru internasional sira, misaun diplomatika sira, organizasaun dezenvolvimentu sira, no setor privadu, kontribui simultaneamente ba prioridade dezenvolvimentu nasional sira ba tempu naruk.
“Hamutuk, Maratona Internasional Dili, Simeira Siensia ba Dezenvolvimentu, no Natal do Povo forma kalendariu uniku ida neebe hatudu Timor-Leste ba mundu iha selebrasaun ba pas, umanidade, desportu, no kultura. Maratona personifika ita-nia espíritu reziliensia, unidade no protesaun ba ita-nia biodiversidade neebe furak; Simeira Siensia nian lori hanoin brillante sira mai ita-nia rain hodi fo inspirasaun ba ita-nia foin-sae sira, haburas inovasaun, no loke dalan ba kresimentu; no Natal do Povo reprezenta espíritu verdadeiru husi ita-nia nasaun tempu ida atu fo, fahe, no halibur hamutuk nuudar família ida deit, hodi garante katak ksolok epoka nian too ba iha ita-nia komunidade sira no moris iha ema Timor-oan sira hotu nia fuan,” dehan Prezidente Republika, Jose Ramos Horta.
Prezidensia Republika no IX Governu Konstitusional konvida parseiru internasional sira, patrosinador sira, no parte interesada sira seluk atu partisipa no fo apoiu ba eventu estratejiku tolu ba tinan 2026. Inisiativa sira-nee oferese oportunidade uniku ida atu kolabora ho nasaun ida neebe dezenvolve lalais, kontribui ba prioridade nasional sira ho impaktu boot, no partisipa iha tinan ida-neebe ho vizibilidade no kooperasaun internasional.
Inisiativa sira-nee refleta vizaun estratejiku nasaun nian hodi hametin envolvimentu internasional, promove dezenvolvimentu inkluzivu, no konsolida unidade nasional. Lansamentu nee marka inísiu husi esforsu nasional neebe koordenadu hodi koloka Timor-Leste nuudar plataforma ba kolaborasaun global, inovasaun, no interkambiu kultural.
Maratona Internasional Dili 2026, harii iha tinan 2010 ho patrosíniu husi Prezidente Jose Ramos-Horta, Maratona Internasional Dili, promove saude, bem-estar, no turizmu hodi halibur partisipante lokal no internasional sira iha selebrasaun desportu no reziliensia.
Maratona 2026, ho tema “Hadomi Ita-nia Ai-laran no Balada Fuik sira”, sei halao iha loron 8 fulan-agostu tinan 2026, no hein katak sei atrai partisipante liu 7,000, inklui atleta internasional sira, korredor amador sira, no membru komunidade sira iha kategoria korrida oioin. Hanesan eventu desportivu prinsipal ida iha nasaun, Maratona nee promove turizmu, vizibilidade internasional, no envolvimentu komunidade nian, no mos promove konsiensia ambiental no pratika sustentavel.
Programa nee hahu ho Korrida Selesaun Nasional iha loron 9 fulan-maiu tinan 2026, iha Dili, hodi atrai partisipasaun publiku dezde inisiu. Jantar Gala ida ho patrosinador no parseiru sira sei halao iha loron 7 fulan-agostu tinan 2026, iha Palasiu Nobre Lahane, hodi fo oportunidade ida atu hametin parseria sira no rekonese kontribuisaun sira.
Komplementa Maratona, DIM EXPO 2026 sei halao iha loron 6 too loron 8 fulan Agostu tinan 2026, iha Palasiu Prezidensial Nicolau Lobato. Festival kultural no ambiental loron-tolu nee expande eventu nee ba selebrasaun nasional loron barak, kombina desportu ho kultura, partisipasaun juventude, no sustentabilidade. Expo sei destaka identidade Timor-oan nian, promove inisiativa ekonomia verde, no envolve parseiru rejional no internasional sira iha area sira hanesan konservasaun biodiversidade, inovasaun, no interkambiu kultural.
Nunee mos kona-ba Simeira Siensia ba Dezenvolvimentu 2026 sei halao iha loron 24–25 Agostu 2026, iha Dili Convention Center, reunidu liu 25 laureadu Premiu Nobel, hamutuk ho siensista sira, polítiku sira, no inovador sira neebe konesidu iha mundu.
Simeira nee sei sai hanesan plataforma altu nivel aas ba dialogu kona-ba siensia, teknolojia, no inovasaun iha servisu dezenvolvimentu sustentavel, hodi koloka Timor-Leste nuudar sentru emerjente ida ba interkambiu konesimentu global. Jantar Gala ba laureadu sira no bainaka espesial sira sei halao iha loron 23 fulan-Agostu tinan 2026, iha Palasiu Nobre Lahane, hodi oferese oportunidade ida ba interasaun altu nivel no envolvimentu diplomatiku.
Nunee mos Expo Siensia no Teknolojia sei halao paralelu ho Simeira, hodi fornese plataforma ida ba akademiku sira, estudante sira, emprezarial sira, inovador sira no patrosinador sira atu aprezenta peskiza, teknolojia, no solusaun sira neebe relevante ba Timor Leste nia dezenvolvimentu. Expo sei promove kolaborasaun, troka konesimentu, no parseria entre peritu internasional sira no parte interesada lokal sira.
Hafoin Simeira nee, partisipante sira sei hola parte iha vizita terrenu neebe organizadu iha Timor-Leste iha loron 26 Agostu 2026, inklui programa sira neebe foka ba biodiversidade no konservasaun tasi nian iha Illa Atauro, no mos agrikultura iha foho, produsaun kafe, no meius subsistensia rural iha Aileu no Munisípiu Maubisse. Vizita sira nee ho objetivu atu liga dialogu sientífiku ba realidade lokal no pratika dezenvolvimentu sustentavel.
Segmentu envolvimentu rejional sei halao iha loron 27 fulan-agostu tinan 2026, inklui vizita sira ba Indonezia, hodi hametin liutan kooperasaun internasional no parseria rejional sira.
Atu hetan informasaun liu tan kona-ba Simeira Siensia ba Dezenvolvimentu 2026, vizita sítiu ofisial.
Natal do Povo 2026 mak selebrasaun ida-neebe halibur komunidade oioin iha nasaun ho espíritu unidade no solidariedade durante tempu Natal. “Natal do Povo” hahu ho abertura ba Espozisaun Prezepiu hodi hamoris fila fali tradisaun Natal neebe apresiada iha nasaun. Espozisaun Prezepiu, tradisaun neebe metin ona iha fiar sarani kristaun nian, nuudar espresaun profunda kona-ba espiritualidade, kreatividade, no espíritu komunitariu. Timor-Leste nian. Tuir mai, Prezidensia fahe prezente Natal ba komunidade sira iha munisipiu laran tomak, inklui labarik, faluk, ema ho nesesidade espesial, pasiente iha Ospital Nasional Guido Valadares, prizioneiru, orfanatu no komunidade sira neebe kbiit laek.
“Natal do Povo” sai nuudar testemuna ba kompromisu Prezidensia no Governu nian hodi promove unidade nasional, selebra kultura Timor-Leste nian, no fahe bensaun sira Natal nian diretamente ho sidadaun sira neebe sira serbí.
(eme)
