DILI, STLTIMORLESTE.com – Prezidente Republika (PR), Jose Ramos Horta hatoo ninia kondolensia neebe klean liu ba Sua Majestade Sultaun Ibrahim, Liurai Malazia nian, Família Real, Governu no povu Malazia hafoin falesimentu husi eis Primeiru Ministru, Tun Abdullah Ahmad Badawi.
Iha karta ofisial kondolensia nian neebe entrega ba Sua Majestade iha loron 15 Abril, 2025, Prezidente Ramos Horta fo onra ba legadu husi eis-líder Malazia nian neebe halao knaar nuudar Primeiru Ministru husi 2003 too 2009.
Iha karta neebe Prezidente Ramos Horta hakerek hatete Timor Leste sei hanoin nafatin matebian Tun estadista ho serinidade, integridade no kompaisaun neebe didika nia aan ba servisu bem estar husi nia nasaun.
“Ami sei hanoin nafatin ho admirasaun legadu husi matebian Tun Abdullah Ahmad Badawi estadista ho serenidade, integridade, no kompaixaun, neebe dedika nia moris ba servisu no bem-estar husi nia Nasaun,: dehan PR Horta liu husi komunikadu neebe STL asesu husi media PR Kuarta (16/04/2025).
Prezidente Republika hatete durante matebian nia mandatu nuudar Primeiru Ministru husi 2003 too 2009, nia lidera Malazia ho matenek no moderasaun, promove estabilidade, dezenvolvimentu ekonomiku no koezaun sosial, enkuantu promove vizaun husi Islam neebe progresivu no tolerante.
Ninia lideransa inspirador mos kontribui ba hametin kooperasaun no amizade iha ASEAN — valor sira neebe Timor Leste fahe no sei kontinua tane aas.
Prezidente espresa esperansa katak memoria Tun Abdullah Ahmad Badawi kontinua sai fonte inspirasaun ba jerasaun futura iha Malazia no Sudeste Aziatiku.
Timor Leste no Malazia iha relasaun bilateral forte neebe harii iha respeitu no kooperasaun mutuu, ho nasaun rua nee servisu hamutuk iha inisiativa rejional oioin.
(eme)
