DILI, STLTIMORLESTE.com – Prezidente Repúblika (PR), José Ramos Horta anunsia planu atu kria Konsellu Konsultivu Timor Leste ba Siénsia, Teknolojia no Dezenvolvimentu, nu’udar rede ida atu kontinua ligasaun entre Governu, universidade, peskizadór, joven sira no sientista internasionál sira.
Ramos Horta hato’o planu ne’e bainhira enserra Simeira Siénsia ba Dezenvolvimentu, iha Centro de Convenções de Díli (CCD), Tersa (25 Agostu 2026).
Nia esplika katak, konsellu ne’e la’ós atu sai instituisaun formál ka estrutura todan, maibé nu’udar rede ida ne’ebé bele fasilita konversa, troka koñesimentu no parseria entre Timor-Leste no sientista ka instituisaun sira iha mundu.
Parseria ne’e bele hala’o liuhusi mentoria ba joven sira, palestra virtual, fó konsellu kona-ba dezafiu espesífiku, halo ligasaun entre instituisaun sira no dezenvolve kolaborasaun iha área peskiza no akademia.
Prezidente dehan konvidadu internasionál sira ne’ebé partisipa iha Simeira hatudu ona interese atu kontinua envolve ho Timor Leste liuhusi fahe sira-nia tempu, koñesimentu no esperiénsia.
“Objetivu husi enkontru hanesan ida-ne’e la’ós de’it atu lori koñesimentu mai Timor-Leste. Objetivu mak mos atu kria koñesimentu hamutuk ho Timor Leste,” afirma Ramos Horta.
Nia subliña katak kontribuisaun ki’ik husi ema sira ne’ebé iha koñesimentu no esperiénsia extraordináriu bele iha impaktu boot ba nasaun joven hanesan Timor Leste.
Iha sorin seluk, Ramos Horta mos alerta kona-ba dezenvolvimentu inteligénsia artifisiál no teknolojia dijitál. Nia husu Timor-Leste atu simu inovasaun ho matenek, hodi uza teknolojia atu aumenta kapasidade umana, maibé la’ós atu troka kapasidade ema nian atu hanoin, husu no foti desizaun.
Nia hein katak relasaun no parseria sira ne’ebé hahú durante Simeira sei kontinua iha futuru, hodi transforma ideia no koñesimentu sira ne’ebé diskute iha Dili sai asaun prátika iha eskola, komunidade, universidade no instituisaun sira.
Ramos Horta remata nia diskursu ho apelu katak siénsia tenke fó benefísiu no oportunidade ba ema hotu, la haree husi ne’ebé sira hahú sira-nia viajen iha prosesu deskoberta.
(eme)
