NOVA IORKE, STLTIMORLESTE.com – Prezidente Repúblika (PR), José Ramos-Horta apela ba foin-sa’e sira atu lidera inovasaun no konstrui futuru dijitál inkluzivu.
Ramos-Horta hato’o apelu ne’e iha Nova Iorke, subliña papél foin-sa’e sira iha dezenvolvimentu teknolojia.
Liu husi komunikadu ne’ebé STL asesu Kuarta (23/09/2026) hatete, intelijénsia artifisiál no teknolojia emerjente sira lori oportunidade boot ba edukasaun, saúde, agrikultura, enerjia no sistema finanseiru.
Maibé, teknolojia mós lori risku hanesan prejuízu, preokupasaun étika, deslokasaun serbisu no divizaun dijitál entre Norte no Súl Globál.
Tanba ne’e Prezidente husu hotu hotu tenke asegura katak teknolojia serve umanidade, la’ós halo dezigualdade sai klean liután.
Prezidente hatete, kestaun teknolojia ba Timor-Leste la’ós debate abstratu, tanba envolve diretamente futuru foin-sa’e sira.
Nia husu se foin-sa’e Timor-Leste sei sai arkitetu ba futuru dijitál ka sai konsumidór de’it ba teknolojia ne’ebé dezenvolve husi nasaun seluk.
Ramos-Horta hatete, besik metade populasaun Timor-Leste iha idade tinan 25 mai kraik, no sira tenke envolve iha lideransa agora.
“Keta hein lisensa atu lidera. Dezafiu sira ne’ebé ita hasoru urjente liu ba gradualizmu.” dehan Prezidente Republika Ramos Horta.
Nia mós destaka movimentu “Zero” ne’ebé envolve foin-sa’e sira iha mundu, hodi promove emisaun karbonu zero, dezempregu zero no pobreza zero.
Prezidente apela ba foin-sa’e sira atu sai konstrutór solusaun no emprezáriu, tanba sira la’ós de’it futuru Timor-Leste, maibé mós parte husi prezente.
Ramos-Horta afirma katak teknolojia tenke uza hodi aumenta oportunidade no igualdade, liuliu ba foin-sa’e sira iha nasaun ki’ik sira.
(eme)
