DILI, STLTIMORLESTE.com – Prezidente Republika (PR), Jose Ramos Horta promulga ona dekretu lei rejime subvensaun publika ba orgaun komunikasaun sosial sira.
Iha biban nee Prezidente Republika Jose Ramos Horta ba jornalista sira iha Palasiu Prezidensial Nicolau Lobato, Bairo Pite, Sesta (14/08/2026) hatete, nia apoiu ba media nee dezde uluk kedas, no konaba dekretu lei rejime subvensaun publika ba orgaun komunikasaun sosial sira promulga ona iha tempu hirak ba kotuk.
“Promulga tiha ona, hau apoiu 100% ba orsamentu 2027 iha loron ruma liu ba, hau apoiu dezde uluk kedas bainhira hau sei eis Prezidente Republika hau koalia konaba ida nee, momentu neeba governu halo ona maibe depois mai iha Prezidente Lu Olo nia mak veta tanba momentu neeba, I Governu tau fila fali hau promulga tiha ona, “ dehan Prezidente Republika Jose Ramos Horta.
Prezidente Republika hatete, apoiu deit mak ba jornalista neebe profisional sira neebe servisu duni, han hemu mai husi sira nia servisu mai husi media, sira neebe tinan hira ona hatudu halo sakrifisiu nuudar jornalista laos sira konta online media sosial nee laos media.
“Media profisionál mak sira neebe halao publikasaun iha jornal iha dili laran, balun jornal online maibe diak profisionál, televizaun, radio komunitariu, hau apoiu tanba fatin balun iha Timor, radio komunitariu mak mos ema rona, depois hau sei haree ho Governu ho ministru haree didiak konkretamente apoiu nee atu ba neebe labele partidariza labele tentasaun fo liu ka fo deit ba media neebe besik liu partidu ida nee ka ida neeba, tenke fo independent ita partidariza hanesan halimar fali ema nia vida ema nia serbisu lahatudu ona respeitu ba ema nia integridade tanba nia araska fo osan ba lae? Hau la konkorda ho ida nee,” dehan PR Horta.
Prezidente Republika hatete, sei haree lai no lafoti ba problema tanba lei nee tenke promulga duni maibe nia implementasaun Prezidente sei haree.
Aleinde nee, foin lalais Prezidente Republika Jose Ramos Horta promulga ona dekretu lei rejime rejime subvensaun publika ba orgaun Komunikasaun sosial sira no publika ona iha jornal Republika.
Iha tuir artigu 1 objetu no ambitu aplikasaun nian. Dekretu nee aprova rejime subvensaun publika ba meius komunikasaun sosial publiku ka privadu sira neebe rejista legalmente neebe halao operasaun iha territoriu nasional. Nunee mos artigu 2 objetivu sira rejime subvensaun publika neebe aprova hosi dekretu ida-nee ho objetivu atu halao objetivu sira tuirmai nee. Atu garante sirkulasaun livre informasaun nian no asesu livre ba produtu informasaun nian.
Prezerva no defende pluralizmu no kompetisaun, fo kontribuisaun ba formasaun profisional mídia nian, Kontribui ba ezersísiu plural no robustu ba liberdade no direitu atu informa no hetan informasaun iha ambitu meiu komunikasaun sosial nian, tuir termu no limite neebe estabelese iha Lei-Inan no lei. Fo apoiu ba meius komunikasaun sosial sira hanesan veíkulu prosimidade ba asesu ba informasaun iha nível munisípiu, rejional no lokal. Atu enkoraja kriasaun, sustentabilidade, kompetitividade, no inovasaun meius komunikasaun sosial munisípiu, rejional, ka lokal, nomeadamente liuhosi apoiu ba uzu intensivu liutan teknolojia foun sira.
Artigu 3 apoiu skema subsídiu publiku ida-nee la taka dalan ba fo ba mídia nasional sira apoiu seluk ruma neebe bele fo hosi entidade privadu nasional, estranjeiru, ka internasional sira.
(eme)
