DILI, STLTIMORLESTE.com – Prezidente Republika (PR), Jose Ramos Horta apoiu jogador husi nasaun Cabo Verde iha kopa mundial, iha biban nee Prezidente hakarak konvida Jogador Messi vizita Timor Leste.
Prezidente Republika Jose Ramos Horta hatoo kestaun nee ba jornalista sira, bainhira remata partisipa serimonia abertura ba formasaun ho tema “Prosedimentu Husi Kuidadu Saude Primaria”, iha salaun INSP TL Komoro, Segunda (08/06/2026).
PR hatete, konvida mos jogador Argentina Messi vizita mos Timor Leste. Maibe Prezidente dehan katak nia apoiu liu nasaun Cabo Verde. “Vamos Contrados Messi para Visita Timor Leste,” dehan Prezidente Republika Jose Ramos Horta.
Prezidente Republika hatete, nia apoiu nasaun Cabo Verde iha Joga Kopa Mundial tanba nasaun kiik foin tama joga iha kopa mundial, tanba nee Prezidente husu harohan ba Maromak para tulun nunee nasaun Cabo Verde mos bele foti piala.
“Maibe hau apoiu mak Cabo Verde, hau apoiu Cabo-Verde sei foti piala hasai husi Argentina nia liman, apoiu tanba rai kiik los, primeiru vez mak tama jogu kopa mundial nee hau admira tebes oinsa mak sira bele tama kopa mundial, tanba nee mak hau apoiu sira, buka bandeira Cabo Verde maibe nein labarik ida faan, entau orsida hau haruka avo suku bandeira Cabo Verde nian hau tau iha hau nia kareta,” dehan PR Horta.
Prezidente Republika hatete, nia mos apoiu jogador husi nasaun Portugal no Brazil maibe nasaun sira nee boot no avansadu, tanba nee la presiza, maibe PR fo nia apoiu tomak ba nasaun Cabo Verde bele foti mos piala iha jogu mundial refere.
“Portugal mos hau apoiu maibe Portugal nasaun antigu, nasaun boot la presiza hau nia apoiu, Cabo Verde mak hau apoiu.
“Ho Nai Maromak nia tulun aban amu Joao nia tinan nia halo 105 anos hau sei husu ba Amo João reza ba Cabo Verde, para Cabo Verde mak manan, se Cabo Verde manan hau hamnasa mate,” dehan dehan PR Horta.
Liga ho futebol foin lalais, Prezidente Republika hasoru malu ho Embaixador Argentina, Gustavo Ricardo Coppa esplora kolaborasaun iha futuru ba setor desportu, liu-liu kona-ba futebol. Planu sira dezenvolve hela atu lori jogador no tekniku Argentina nian mai Timor Leste iha tinan oin hodi ajuda dezenvolve talentu desportivu lokal. Embaixador Coppa enfatiza katak maske saude no desportu sai nuudar prioridade atual, nasaun rua nee iha intensaun hodi habelar kooperasaun ba area seluk tan wainhira parseria diplomatika nee kontinua dezenvolve.
(eme)
