DILI, STLTIMORLESTE.com – Prezidente Republika (PR), Jose Ramos Horta apresia ba Diretor Esperansa Timor Oan (ETO), Nilton Gusmão neebe estabelese Parke Industrial no Integra Unidade Fabrika Lima iha Munisipiu Manatutu.
Prezidente Republika hatoo apresiasaun nee ba jornalista sira iha Palasiu Prezidensial Nicolau Lobato, Bairo Pite, Tersa kalan (31/03/2026).
Prezidente Republika hatoo apresia no parabens ba Nilton Gusmão neebe ho inisiativa estabelese Parke Industrial ho unidade Fabrika Lima mak ba Produsaun kaixa, Produsaun Strutura metalika H-Beam prosesamentu sardina enlatada, Matadouru no industria prosesamentu naan no benifisiamentu foos.
“Nee diak tebe-tebes, hatudu senhor Nilton Gusmão nia komitmentu kompromisu nia bisnisman ida matenek nia buka parseiru investor nasional no internasional hamutuk ho nia halo parque industrial iha Manatutu, buat selu-seluk neebe nia halo nia mak sosa Timor Telekom maioria nee diak tanba Timor Telekom araska oituan tanba osan laiha, Governu tinan hira nia laran apezar ke Governu estadu mos sosiu iha Timor Telekom nunka tau osan didiak ba Timor Telekom,” dehan Prezidente Republika.
Xefe Estadu hatete, Estadu rasik deve pelumenus 7 ka 8 milhoens dolar ba Timor Telekom, portantu Nilton Gusmão kaer nia bele rekupera Timor Telekom bele sai telekomunikasaun ida modernu profisional bele konkorente ho telemor ho telekomcel.
“Hau agradese no fo parabens ba senhor Nilton Gusmão hanesan mos ho emprezaria Timor oan sira seluk, porzemplu ida halo Hotel,” katak Horta.
Xefe Estadu hatete, Nilton Gusmão emprezaria Timor oan neebe kontribui makaas halo Hotel boot balun nomos City 8 JL Vila pelumenus tolu neebe harii husi Timor oan.
“Nia uluk iha Australia Hotel nee diak tebes, ema hotu-hotu gosta, depois senhor Jorge Serano halo investimentu oin-oin, nomos Lorenco Atauru nee merese respeitu, hau apoiu sira makaas, sira mak hanesan pioneiru emprezariu neebe tau sira nia osan balun sira husi imprestimu banku todan tebes sira araska, portantu parabens no obrigadu boot ba sira,” dehan PR Horta.
Aleinde nee Primeiru Ministru Kay Rala Xanana Gusmão ho Diretor Ezekutivu Esperansa Timor Oan, Nilton Gusmão ofisialmente halo ona lansamentu ba projetu parque industrial iha Aldeia Carlilo, Suku Aiteas, Postu Administrativu Manatutu, Munisipiu Manatutu, neebe konstrui husi kompanha ETO nuudar parte estratejia ida husi Governu atu promove dezenvolvimentu industria hodi kria serbisu ba komunidade iha area remotas.
Parke Industrial nee integra unidade Fabrika Lima mak ba Produsaun kaixa, Produsaun Strutura metalika H-Beam prosesamentu sardina enlatada, Matadouru no industria prosesamentu naan, no benifisiamentu foos.
Tuir Diretor ETO, Nilto Gusmão katak, objetivu husi investimentu ida nee kria empregu no hamenus Timor Leste nia depedensia ba Importasaun.
Aleinde nee projetu refere iha faze dahuluk ho Investimentu entre milhaun US$ 13 too 15, durante faze konstrusaun estimative hatudu katak sei kria entre 100 too 150 postu servisu no fo mos prioridade ba Timor oan.
Iha faze operasaun Fabrika parke Industrial ida nee kria empregu diretu entre ema 600 too 700 no liu 1.500 hetan empregu indireitu.
(eme)
