DILI, STLTIMORLESTE.com – Prezidente Republika (PR), Jose Ramos Horta hetan vizita husi asesor Prinsipal Prinseza Real Maha Chakri Sirindhorn iha Palasiu Prezidesial, hodi koalia kona-ba nutrisaun no agrikultura.
Bainhira remata hasoru malu, Prezidente Republika Jose Ramos Horta ba jornalista sira iha Palasiu Prezidensial Nikolao Lobato, Bairo Pite, Kinta (05/06/2025) hatete, ohin hetan vizita husi asesor Prinsipal Prinseza Real Maha Chakri Sirindhorn, delegasaun husi Rei Tailandia.
Prezidente Republika hatete, delegasaun nee mai husi Palasiu Real Rei Tailandia nia, sira servisu direitamente ho Prinseza Mar, Prinseza nee liurai boot nia alin feto neebe mai Timor Leste dala rua ona.
Xefe Estadu hatete, sira iha programa lubuk ida iha Dili nomos iha Hera no Gleno, ida nee Prinseza Tailandia mak apoiu iha tinan lubuk ida nia laran.
“Iha programa balun iha Dili, Hera, iha Gleno, Prinseza Tailandia mak apoiu kleur ona tinan lubuk ida nia laran liu-liu nutrisaun, kona-ba agrikultura sustentavel no programa nee kontinua sira mai haree monitor programa neebe Prinseza Mar mak finansia,” dehan Xefe Estadu.
Prezidente Republika hatete, sira rona programa nee tanba Embaixador Tailandia mai iha kantina matak dala hira ona, no enkontru bilateral PR esplika Prezidente nia atividade neebe buka tane nutrisaun ba labarik sira ba inan sira, tanba nee sira hakarak haree oinsa bele apoiu liu tan, tanba nee mai vizita.
(eme)
