DILI, STLTIMORLESTE.com – Prezidente Republika (PR), Jose Ramos Horta halo despedida ho Guarda Seguransa Sivil nain ida neebe reforma ona.
Prezidente Republika, Jose Ramos Horta halo despedida ho Guarda Seguransa Sivil, Antonio da Conceição, tanba hakotu ona nia servisu nuudar guarda tanba idade too ona atu reforma.
Iha biban nee Prezidente Republika Jose Ramos Horta ba jornalista sira iha Palasiu Prezidensial Nicolau Lobato, Bairo Pite, Kuarta nee (01/07/2026) hatete, ohin halo despedida ho sidadaun Timor oan ida neebe durante nee halao knaar iha Palasiu Prezidensial nuudar guarda seguransa sivil tanba nia idade too duni atu reforma.
Prezidente Republika hatete, sidadaun nee horiseik remata nia servisu, halao servisu tinan 23 ona, hahu iha Palasiu Governu depois mai iha Palasiu Prezidente 2008 bainhira iha Prezidente nia mandatu primeiru no daudaun nee halao servisu tinan 23 no nia hahu nia servisu ho idade 43 ohin reforma ho idade 65 anos.
“Ohin hau konvida mai han hamutuk despedida maibe despedida nee laos ohin la haree ona lae? Prezidensia sempre iha programa sira neebe remata servisu fo osan oituan hau la lembra rihun US$ 2 ka liu tan ba sira, aleinde buat neebe tuir lei, estadu mak sei selu sira, maibe sempre kontinua ajuda kuandu familia ruma moras iha problema ruma bele mai kedas klinka prezidente nia doutor sira bele halo tratamentu, karik moras boot hospital bele lori ba Hospital Guido Valadares ou iha Bairo Pite neebe besik,” dehan PR Horta.
PR dehan, nia laos hasoru malu deit ho Primeiru Ministru ka ministru ka embaixador sira maibe halo mos enkontru mos povu kiik sira, no ohin mos halo despedida ho guarda seguransa ida neebe mak reforma ona tanba idade too ona 65.
“Ohin almosu importante ho Timor oan ida humilde, tempu funu idade sei joven halai ba matebian depois TNI kaer nia lori ba Uatucarbau sorte la tama prizaun depois mai Dili kontinua estudu depois remata servisu iha transporte depois hetan vida foun indepedensia mai hetan servisu nuudar guarda segurasa sivil.
Prezidente mos husu membru guarda sivil nee hakarak servisu nafatin ka lae? Maibe guarda nee hatete hakarak deskansa iha uma deit.
“Ajuda Prezidensia fo rihun US$ 2 ka US$ 3 nee sei fo Cash fo kedas ohin ka aban maibe loron ruma hau hakarak ba vizita iha uma para haree sira nia hela fatin se bele ajuda hadia uma oituan bele ajuda, se prezidensia iha orsamentu ba ida nee se laiha hau ajuda husi fatin seluk laiha problema fasil, maibe hau hakarak haree Timoroan sira hanesan nee hela uma oinsa, vida mak nee loron loron dezafiu ba Timor oan lubuk ida, rihun ba rihun kondisaun nunee sorte ona se hetan etu bikan ida, modo manu tolun dadersan han sasoro maibe balun la han tanba deit eskola,” dehan PR Horta.
Nunee mos Guarda Seguransa Sivil, Antonio da Conceição hatete, nia mandatu remata iha loron Tersa no loraik halo despedida ho Prezidente Republika no Prezidente hatete, durante nee kontribui tinan barak ona no iha direitu atu reforma, tanba nee ohin mai han hamutuk ho Prezidente no halo mos despedida ikus.
“Horiseik halo despedida ikus no Prezidente dehan durante nee kontribui tinan barak tanba nee ohin Prezidente oferese almosu ida,” katak nia.
Nia hatete, Prezidente mak promete sei fo apoiu ruma, ida nee prezidente rasik mos dehan nia la husu buat ida, maibe Prezidente hakarak apoiu Cash ruma nee tanba haree ba nia servisu tinan barak ona too reforma.
Nia hatutan, nia hahu nia servisu ho idade 40 resin no reforma iha idade tinan 65, no servisu iha Palasiu Prezidensial nuudar seguransa sivil tinan 20.
(eme)
