DILI, STLTIMORLESTE.com – Prezidente Republika (PR), Jose Ramos Horta simu vizita Diretor ABC husi Brazil neebe akompanha husi Embaixador Brazil iha TL, diskute hamutuk oinsa hametin kooperasaun estratejika iha area edukasaun.
Prezidente Republika, Jose Ramos Horta simu Ruy Pereira, Diretor Ajensia Kooperasaun Brazileira (ABC), no Embaixador Brazíl iha Díli hodi halo enkontru estratejiku kompromisu naruk Brazíl nian ba dezenvolvimentu estrutural no inkluzaun sosial iha Timor Leste.
Bainhira remata hasoru malu, Diretor Ajensia Kooperasaun Brazileira (ABC), Ruy Pereira ba jornalista sira iha Palasiu Prezidensia Nicolau Lobato, Bairo Pite, Sesta lokraik (21/08/2026) hatete, sente kontente tebes mai hasoru malu ho Prezidente Republika Jose Ramos Horta hodi koalia hamutuk ba kompromisu naruk Brazíl nian ba dezenvolvimentu estrutural no inkluzaun sosial iha Timor Leste.
“Hau nuudar Diretor Ajensia ABC nian, kualker asaun nee iha frasaun ida husi retoma independensia Timor nian, hodi fo apoiu ba projetu sira, operasaun sira neebe ita bolu estruturasaun, no oinsa halo hela inkluzaun sosial,” dehan Diretor ABC.
Foku sentral husi enkontru nee mak atu hametin lian Português, neebe Prezidente Ramos Horta defende nuudar pilar definidor ba identidade nasional Timor nian. Parte rua nee konkorda atu haforsa inisiativa edukasional sira neebe lao hela atu promove lian nee iha nível aprendizajen hotu-hotu, husi edukasaun bazika too nível universidade.
Nunee mos Embaixador Brazil ba Timor Leste Ricardo Lustosa leal hatutan durante halo enkontru ho Prezidente Republika deskute assuntu neebe importante liha ho lian Portugues neebe hanesan mos lian ofisial Timor Leste nia.
“ Naturalmente, ita fahe, informa ba prezidente iha sentidu katak area Timor-Leste hanesan area portuges ida tanba Timor Leste nia lian ofisial ida mos Portugues,” katak Embaixador.
Atu apoia vizaun konjunta nee, Brazíl hametin liutan ninia parseria akademika sira ho Universidade Nasional Timor Lorosae (UNTL). Ho apoiu kolaborativu husi universidade federal prinsipal sira husi Brazíl, kooperasaun nee sei kontribui diretamente ba estabelesimentu programa pos-graduasaun, mestradu no doutoramentu foun iha rai laran.
(eme)
