DILI, STLTIMORLESTE.com – Prezidente Repúblika (PR), José Ramos-Horta enkontru ho Embaixadora Austrália ba Asosiasaun Nasaun Sudeste Aziátiku (ASEAN), hodi hametin no haforsa kooperasaun rejionál.
Bainhira remata hasoru malu, Embaixadora Austrália ba Asosiasaun Nasaun Sudeste Aziátiku (ASEAN), Sra. Tiffany McDonald, ba jornalista iha Palásiu Prezidensiál Nicolau Lobato, Bairo Pité, Kuarta (16/09/2026) hatete, enkontru ne’e nia objetivu prinsipál mak atu reafirma apoiu maka’as hosi Governu Austrália nian ba Timor-Leste, hodi marka vizita dahuluk diplomata nian mai rai ne’e dezde nasaun ne’e sai membru ho direitu tomak (membru plenu) iha ASEAN.
“Hanesan Embaixadóra Austrália nian ba ASEAN, depois Timor-Leste sai ona membru plenu husi ASEAN. Entaun, objetivu husi ha’u nia vizita mai Dili klaru iha ne’e ohin, atu ko’alia ho Excelénsia katak Austrália apoiu maka’as Timor-Leste membru ASEAN nian, no mós atu ko’alia liuhosi área kooperasaun hotu-hotu, katak ita bele avansa hamutuk, liuliu atu asegura katak adezaun ASEAN nian,” dehan Embaixadora.
Nia hatete, nafatin halo kooperasaun hamutuk, servisu besik hamutuk atu apoia ekipa Timor-Leste ba membru ASEAN nian. Entaun, liuhosi programa kooperasaun ASEAN nian, Governu Austrália servisu besik tebes ho Estadu membru ASEAN hotu-hotu atu entrega prioridade sira ne’ebé ASEAN identifika, bele kona-ba tranzisaun enerjétika, bele kona-ba integrasaun ekonómika, bele kona-ba transformasaun dijitál.
Durante reuniaun ne’e, Xefe Estadu no diplomata Austráliana ne’e aborda área oioin ba kooperasaun estratéjika nian atu la’o hamutuk ba oin. Embaixadora Tiffany McDonald subliña katak programa apoiu Austrália nian aliña ho prioridade sira iha ASEAN nian rasik, ho foku espesiál ba setór vitál sira ba dezenvolvimentu rejionál, hanesan tranzisaun enerjétika, integrasaun ekonómika, transformasaun dijitál no promosaun ba organizasaun rejionál ida ne’ebé “sentradu ba ema”.
Enkontru ne’e serve hodi subliña kompromisu hamutuk atu garante katak integrasaun Timor-Leste nian iha ASEAN lori rezultadu pozitivu no tangível ba povu Timoroan, ba organizasaun no ba estabilidade rejiaun tomak ne’ebé fahe hamutuk ho Austrália. Diplomata ne’e destaka katak kompromisu maka’as hosi Governu Austrálianu simu ho di’ak tebes hosi autoridade nasionál sira.
Audiénsia ne’e konta mós ho prezensa reprezentasaun diplomátika bilaterál Austrália nian iha Dili, ne’ebé aproveita okaziaun ne’e atu reafirma kontinuidade servisu hamutuk ho Prezidente Repúblika no Governu Timor-Leste. Esforsu bilaterál ne’e sei kontinua foka ba apoiu ba polítika nasionál sira no ba kapasitasaun rai ne’e nian atu asume ninia ambisaun no responsabilidade sira iha komunidade Sudeste Aziátiku nia leet.
(eme)
