DILI, STLTIMORLESTE.com – Prezidente Republika (PR), Jose Ramos Horta enkontru ho ekipa Internasional husi setor Justisa Tribunal Rio de Janeiro neebe sei partisipa iha IV kongresu CPLP, hodi koalia konaba Justisa Itinerante lori justisa besik ba povu.
Bainhira remata enkontru, Vise Prezidente Nasional Institutu Brasileiru de Direitu de Familia, Maria Berenice Dias, ba jornalista iha Palasiu Prezidensial Nicolau Lobato, Bairo Pite, Tersa (07/07/2026) hatete, ekipa mai halo enkontru ho Prezidente Republika Jose Ramos Horta hodi koalia konaba programa Justisa Itinerante lori justisa besik povu iha area rurais.
“Ohin setor justisa husi Tribunal Justisa Rio de Janeiro mai troka opinaun no troka idea no esperensia aprende ba malu hodi koalia konaba programa Justisa Itinerante lori justisa besik povu iha area rurais. Mai ita hahu husi fuan iha nee, ita sei hahu iha nee. Ami mai husi Brazil, Institutu Brazileiru Direitu Família nian no Tribunal Justisa Rio de Janeiro nian, atu halao kongresu ida neebe sei akontese iha nee, hodi halibur jurista brazileiru sira ho jurista, estudante, no akademiku sira husi rejiaun nee. Ideia neebe ita iha mak atu kria interkambiu ida, atu fahe konesimentu, troka esperiensia, no aprende husi malu,” dehan nia.
Nia mos reprezenta ekipa internasional nee agradese ba prezidente Republika Jose Ramos Horta ba ninia esforsu tomak hodi kria idea ida nee, oinsa mak lori justisa besik ba komunidade sira.
Iha biban nee, Prezidente Republika Jose Ramos Horta hatete sente haksolok hasoru malu ho ekipa internasional husi Tribunal Rio de Janeiro hodi troka idea ba malu oinsa mak lori justisa besik ba povu.
Prezidente Republika promete hodi halo esforsu tomak atu hadia liutan relasaun ida neebe diak ho ekipa nunee bele atinzi buat nebee Prezidente rasik hakarak liu liu lori justisa besik ba povu.
Xefe Estadu enfatiza katak dezenvolvimentu kontínua iha setor justisa maka obrigasaun nasional vital neebe tenke opera ho independente husi siklu polítiku governu nian.
Nunee mos Embaixadora Timor Leste ba Brazil, Maria Angela Guterres Viegas Crascalao hatutan enkontru ho Prezidente Republika hahu hodiseik mai koalia relativamente ba justisa Itinerante neebe prinsipiu konseitu sira nia justisa tenke too ba ema hotu hotu, invez ema mak mai, justisa azves mos fasil, mos iha Timor ema mai direitamente ba Dili ka ba rai seluk hetan justisa, entau justisa mak ba hasoru populasaun buat sira nee normal iha Brazil sira iha konseitu nee sira aplika ona.
“Ohin institute Brazileiru direitu de Familia aban komesa kongresu ida imparseria ho eskola majistratura Rio da Janairo koalia relativamente ba direitu ba Familia dosaun sasan sira nee hotu dala ruma ita la tuir tanba seidauk iha lei,” dehan Embaixadora.
Embaixadora hatete, sira mais laos hanorin Timor lae, maibe mai troka esperensia hamutuk no halo interkambiu ho Timor Leste saida mak bele pozetivu ba Timor Leste bele kaer nunee sira mos bele hatutan sira nia esperensia ba Timor Leste.
“Relativamente ba formasaun majistratura haree ba supremu Tribunal sira mos oferese dehan kualker tipu konserteza sira mos bele ho kriasaun Supremu tribunal Justisa, no sira mos bele ajuda ho konstitusionalidade hanesan supremu tribunal nia, buat ida nee diak ba ita hanesan Hau embaixadora TL ba Brazil diak ba ita tanba hau iha Brazil maibe intrese laos deit husi Brazil intrese nee mai los husi estadu Rio de Janeiro, eskola Rio de Janeiro importante los halo majistratura,” katak nia.
Nia hatete sira mos hatudu nia vontade bele ajuda Timor Leste tuir saida mak estadu direitu demokratiko.
(eme)
