DILI, STLTIMORLESTE.com – Prezidente Republika (PR), Jose Ramos Horta halo enkontru nivel altu ho Prezidente Republika Vanuatu, Nikenike Vurobaravu, hodi hametin relasaun bilateral rai rua iha futuru.
Prezidente Republika, Ramos Horta halao sorumutu kortezia ofisial ida ho Prezidente Republika Vanuatu, Nikenike Vurobaravu, iha Kuarta (29/07/2026), Sorumutu nivel aas nee akontese iha Rezidensia Ofisial Xefe Estadu vanuatu nian iha Port Vila nuudar parte husi Prezidente Ramos-Horta nia Vizita Estadu istorika dahuluk.
Sorumutu entre Xefe Estadu rua nee inklui diskusaun bilateral formal no serimonia troka prezente, neebe simboliza respeitu mutuu no parseiria ho abut klean entre nasaun insular rua nee.
Enkontru diplomatiku signifikativu nee fo oportunidade vital ida atu reafirma lasu istoriku klean husi amizade, solidariedade, no kooperasaun neebe hametin Timor-Leste no Vanuatu, bainhira sira kontinua hametin sira-nia relasaun bilateral no aspirasaun rejional neebe fahe hamutuk.
Prezidente Republika vizita Estadu ba nasaun Republika Vanuatu nee reafirma lasu amizade no solidariedade neebe metin entre Timor Leste no Vanuatu Estadu Dezenvolvimentu Illa Kiik rua neebe unidu liu husi aspirasaun komun ba dezenvolvimentu sustentavel, reziliensia klimatika, no estabilidade rejional.
Vanuatu iha fatin ida neebe espesial iha Timor Leste nia memoria istorika. Durante Timor Leste nia luta ba autodeterminasaun, Vanuatu nuudar estadu illa Pasífiku uniku neebe hamutuk ho TL.
Iha vizita nee, Prezidente Republika Jose Ramos Horta halo enkontru nivel altu ho Prezidente Republika Vanuatu Nikenike Vurobaravu hodi hametin relasaun bilateral rai rua iha futuru sai metin liu tan.
Prezidente halao serie enkontru ho alto nivel sira, hahu ho konversa sira ho Nikenike Vurobaravu, Prezidente Republika Vanuatu nian, tuir fali ho enkontru bilateral ho Primeiru Ministru Jotham Napat. Programa sira inklui enkontru ho Prezidente Parlamentu, Hon. Stephen Felix.
Aleinde nee Prezidente Ramos Horta sei hatoo palestra publika iha Universidade Nasional Vanuatu no partisipa iha serimonia boas vindas stradisionsl iha Chiefs Nakamal.
Durante vizita nee, Prezidente Ramos Horta sei konfere Ordem de Timor Leste ba líder Vanuatu sira nuudar rekonesimentu ba sira-nia kontribuisaun signifikativu ba Timor-Leste.
(eme)
