DILI, STLTIMORLESTE.com – Prezidente Repúblika (PR), José Ramos-Horta ezije asaun klimátika urjente no finansiamentu direta ba komunidade vulnerável sira, hodi remata atrazu burokrátiku.
Apelu ne’e hato’o Xefe Estadu iha Diálogu Sautalaga iha Tuvalu, ne’ebé foka ba impaktu krize klimátika hasoru nasaun insulár sira.
Ko’alia ba líder sira, Prezidente Ramos-Horta reflete kona-ba ninia viajen globál sira, ne’ebé fó oportunidade atu haree diretamente impaktu klimátiku iha Pasífiku.
Prezidente hatete katak, mundu ohin loron simu konsekuénsia husi sékulu barak ne’ebé ema la kuida ambiente, inklui aumentu nivel tasi no mudansa klima.
“Finansiamentu klimátiku tenke hakat liu bareira burokrátika no kanaliza diretamente ba komunidade sira iha terenu,” dehan Prezidente Republika liu husi komunikadu ne’ebe STL asesu Kuarta (07/10/2026).
Nia mós subliña katak, nasaun insulár ki’ik no vulnerável sira la presiza tan estudu sientífiku ka relatóriu peritu ne’ebé karun atu hatene impaktu klimátika.
Ramos-Horta hatete, katak intelijénsia artifisiál (AI) bele ajuda kompila no analiza dadus klimátiku ne’ebé iha ona, hodi fasilita tomada desizaun.
Xefe Estadu ezije pelumenus 80 pursentu husi fundu klimátiku globál atu kanaliza direta ba komunidade sira iha terenu, ne’ebé hasoru impaktu diretamente.
Pozisaun ne’e mós alinha ho diskursu enserramentu lideransa Tuvalu, ne’ebé subliña nesesidade atu husik dependénsia ba kombustível fósil.
Tuvalu no nasaun insulár sira seluk enfrenta ameasa boot husi aumentu nivel tasi, fenómenu meteorolójiku estremu no lakon rekursu naturál.
Iha diálogu ne’e, lider sira mós diskute nesesidade atu fó prioridade ba solusaun lokal ne’ebé bele responde diretamente ba nesesidade komunidade afetada.
Nu’udar parte husi solidariedade ba estadu frájil sira, Ramos-Horta husu Austrália no Turquia atu garante COP31 lori rezultadu finanseiru ne’ebé signifikativu.
Nasaun rua ne’e hein atu sai ko-prezidente COP31, ne’ebé sei sai plataforma importante atu avansa kompromisu internasionál kona-ba mudansa klimátika.
Ramos-Horta subliña katak, simeira klimátika labele sai de’it fatin ko’alia, maibé tenke produz desizaun no apoiu finanseiru ne’ebé bele sente iha komunidade.
Timor-Leste reafirma kompromisu atu hamriik hamutuk ho nasaun Pasífiku sira, liuliu iha esforsu komún kontra krize klimátika.
Ba Timor-Leste, kooperasaun ho nasaun insulár Pasífiku importante tanba nasaun sira ne’e fahe vulnerabilidade hanesan kona-ba impaktu mudansa klimátika.
Krize klimátika kontinua aumenta presaun ba nasaun insulár ki’ik, liuliu liuhusi aumentu nivel tasi, erosão tasi-ibun no fenómenu meteorolójiku estremu.
Nasaun vulnerável sira dala barak enfrenta difikuldade atu asesu fundu klimátiku, tanba prosesu aplikasaun no rekizitu burokrátiku ne’ebé komplika.
Tanba ne’e, Timor-Leste defende mekanizmu finansiamentu ne’ebé simples, transparente no direta, hodi garante rekursu to’o ba komunidade sira ne’ebé presiza liu.
(eme)
