DILI, STLTIMORLESTE.com – Prezidente Republika (PR), Jose Ramos Horta fahe prosesu pas no dezenvolvimentu Timor Leste (TL) nia iha eventu dialogu Shangri-La ba dala 23 iha Singapura.
Prezidente Republika, Jose Ramos Horta hatoo lia hirak nee ba jornalista sira, bainhira remata vizita trabalhu ba Singapura no Indonezia fila hikas mai TL iha Aeroportu Internasional Nicolau Lobato, Kuarta nee (03/06/2026).
PR hatete, durante partisipa iha eventu dialogu Shangri-La ba dala 23, iha Singapura, fahe informasaun konaba progresu Timor leste liga ho pas no dezenvolvimentu no seluk tan.
Prezidente Republika partisipa iha atividade eventu rua iha Singapura sai iha media nasional no Internasional, nee eventu annual Shangri-La ba dala 23, dialogu konaba seguransa iha asia pasifiku halo palestra lubuk ida ho intervistador.
“Foka mos ba situasaun iha Timor hau sempre, hau nia obrigasaun fahe imformasaun konaba prosesu pas no dezenvolvimentu iha Timor Leste adezaun ba asean no ita nia atividade iha asean laran no presfektiva ba oin relasoens ho indonezia iha asean nia laran nomos koalia konaba problema internasional, problema boot sira nee,” dehan PR Horta.
Alende nee halo enkontru bilateral ho primeiru Ministru, no Prezidente vietname nia, no Primeiru Ministru Kay Rala Xanana Gusmao mos sei vizita ofisial ba vietname, no Timor leste nia relasaun importante ho vietname.
“Vietname sira nia ekonomia numeru um iha mundu ema hotu hotu hakarak ba vietname hau ba tiha ona nuudar Xefe Estadu 29-30 julho 2024 hau iha neeba, no Primeiru Ministru ba agora ho delegasaun importante ida para avansa ho politika dezenvolvimentu investimentu Timor nia ho vietname,” dehan PR Horta.
Prezidente Republika hatete, bainhira remata partisipa dialogu Shangri-la kontinua viajen ba Indonezia – Jakarta halo komferensia ida eskola ERIA School of Government halo intervensaun besik oras tolu nia laran koalia konaba istoria Timor nia.
Durante iha singapura Prezidente Republika Jose Ramos Horta halao enkontru ho Prezidente Republika Vietname To Lam hodi deskute hamutuk oinsa hametin bilateral rai rua. Enkontru nivel aas nee foka liu ba aprofunda ligasaun istorika entre nasaun rua nee no esplora dalan foun ba kolaborasaun diplomatika no ekonomika.
Prezidente Ramos-Horta hatoo parabens ba Prezidente Tô Lâm tanba foin simu pose, nuudar sinal ba kapítulu foun ida iha parseria neebe makaas entre Timor-Leste no Vietname.
Pontu importante ida husi diskusaun nee mak Vietname nia anunsiu kona-ba prosesu atu harii Embaixada rezidente ida iha Díli, pasu ida neebe sei hafasil liu tan kooperasaun bilateral.
Prezidente Ramos-Horta hatoo agradesimentu boot ba Vietname nia apoiu neebe kontinua ba Timor-Leste nia adezaun ba ASEAN nuudar membru ba dala 11. Líder nain-rua reafirma sira-nia kompromisu ba estabilidade rejional, no Vietname promete atu kontinua fo apoiu Timor-Leste neebe sai ona membru plenu no ba Timor-Leste nia futuru Prezidensia ASEAN iha tinan 2029.
Dialogu nee mos kobre objetivu dezenvolvimentu estratejiku sira, inklui infraestrutura, telekomunikasaun, no setor enerjia.
(eme)
