DILI, STLTIMORLESTE.com – Prezidente Republika (PR), Jose Ramos Horta fo benvindu ba Roo Biblioteka MV Doulos Hope neebe fila-fali mai Portu Dili, hodi reafirma ninia kompromisu klean ba edukasaun no alfabetizasaun ba foinsae sira.
Liu husi diskursu iha Portu Dili, Segunda (17/08/2026), Prezidente Republika Jose Ramos Horta hatete, Roo Biblioteka MV Doulos Hope mai Timor hodi reafirma ninia kompromisu klean ba edukasaun no alfabetizasaun foinsae sira ho inovasaun teknolojia.
“Fo benvindu ba Roo Biblioteka MV Doulos Hope neebe fila fali mai Portu Dili, hodi reafirma ninia kompromisu klean ba edukasaun no alfabetizasaun foin-sae sira-nian,” dehan Prezidente Republika, Jose Ramos Horta.
Koalia nuudar Bainaka Onra, Xefe Estadu ho laran luak hanoin hikas ninia vizita sira uluk ba ro nee iha neebe nia rasik sosa livru ba lee nain foinsae Timoroan sira.
Atu fo apoiu ba roo nia misaun nobre hodi lori konesimentu ba nasaun, Prezidente Ramos-Horta hatoo orientasaun benvindu nian ba ofisial governu sira, hodi husu atu ro nee isentu total husi taxa portu no impostu hotu hotu atu garante katak sira nia rekursu edukativu nafatin asensível ba publiku.
Uza plataforma nee hodi destaka nasaun nia futuru sientifiku, Prezidente ofisialmente konvida ro nia tripulasaun internasional ba eventu istoriku ida neebe besik ona atu akontese enkontru ida husi Premiu Nobel no inovador global sira neebe sei too mai Timor Leste iha fulan nee nia laran.
Prezidente Republika (PR), Ramos Horta destaka katak laureadu sira nee sei interaje diretamente ho estudante universitariu no akademiku sira atu promove makaas edukasaun siensia no teknolojia.
Prezidente Ramos Horta mos fo sai katak, kompanhia boot ida husi Japaun dadaun nee halo daudaun investimentu ba ida neebe sei sai nuudar estaleiru (fatin konstrusaun roo) boot liu ida iha reziun Aziatika, neebe lokaliza rasik iha Timor-Leste. Espekta atu lansa ninia ro tasi nian primeiru iha tinan 2028 no ikusmai sei fo serbisu ba sidadaun liu 4.000, fasilidade nee sei sai nuudar sentru prinsipal ba konstrusaun no manutensaun marítima nian. Hodi remata ninia diskursu ho ninia ospitalidade neebe konesidu, Prezidente ho laran-luak konvida MV Doulos Hope atu konsidera Dili nuudar ninia uma segundu neebe permanente.
(eme)
