DILI, STLTIMORLESTE.com – Prezidente Republika (PR), Jose Ramos Horta hatete, nia fo indultu ba prizioneiru sira demora tanba dokumentus husi Governu liu husi Ministeriu Justisa mak komplikadu.
Prezidente Republika Jose Ramos Horta hatoo kestaun nee ba jornalista sira, bainhira remata vizita trabalhu ba Singapura no Indonezia fila hikas mai Timor Leste iha Aeroportu Internasional Nicolau Lobato, Komoro, Kuarta nee (03/06/2026).
PR hatete, nia too agora seidauk fo indultu ba prizioneiru sira neebe naran mai husi Governu tanba dokumentus mak komplikadu.
“Assuntu nee demora tanba afinal prosesu formal nee komplikadu tanba kuandu Ministeriu Justisa haruka lista mai maibe lalori no dokumentus kompletu depois hau deside tiha indultu ba ida deit, tenke haruka fali ba konsellu Ministru, konsellu Ministru mak tenke aprova,” dehan Prezidente Republika.
Prezidente Republika hatete, sei hasoru malu mos ho NGO neebe mak luta ba direitu feto hanesan Fokupers, Rede feto nomos igreza hodi konsulta assuntu balun liga ho prizioneira neebe iha Gleno.
“Indultu ida deit maibe iha problema dilema boot ida, hau husu tiha ona hasoru malu ho Fokupers, rede feto grupu sira nee tanba iha priozioneira iha gleno neebe kondena ho krime infantisidu oho oan hetan akuzasaun ou oho oan depois agora isin rua tan fali ona oan ida iha prizaun atu halo los saida ba ida nee, atu fo indultu mais depois nia komete krime infantisidu nee, entau hau hakarak rona NGO sira nee tanba nee dilema moral boot ida, laos dilema politiko maibe nee moral,” dehan PR Horta.
Prezidente hatete lakohi kosok oan ida moris iha kadeia, maibe karik lori labarik nee entrega ba inan nee nia halo saida ba labarik nee, karik entrega ba madre sira bele.
Maibe Kosok oan nee fulan ida ho balun labele hasai husi inan nia hirus matan se hasai nia trauma ona nia buka inan entau ho ida nee Prezidente sei koalia ho Igreza nomos NGO neebe koalia konaba direitu feto oinsa bele fo solusaun.
Prezidente Republika temi katak fo deit indultu ba prizioneiru nain ida karik ida nee padre Richard kalae hatan ba kestaun Prezidente hatete padre nia naran laiha no la fo indultu.
Foin lalais Ministru Justisa Sergio Hornai hatete Governu haruka ona lista indultu hamutuk 38 inklui Padre Richard Daschbach ba Prezidente Republika, Jose Ramos Horta, hodi hetan indultu iha 20 Maiu 2025.
Ministru Justisa dehan, nia haruka ona lista hamutuk 38 inklui Padre Richard Daschbach ba Prezidente Republika hodi bele hetan indultu iha 20 Maiu, maibe ida nee kompetensia Prezidente Republika.
“Kona-ba komutasaun pena nomos indultu, hau hanesan Ministru hatoo ona mai iha Prezidente Republika, liu-liu husi Sua Excelência Primeiru Ministru hatoo ona mai iha Prezidente Republika no ami hatoo ona no ami sei konklui buat balun hodi hatoo mai iha Sua Excelência Prezidente Republika no Prezidente Republika sei hola desizaun, tanba ida nee kabe ba indultu nomos komutasaun de pena nee kabe ba iha kompetensia Prezidente Republika.
Ministru Justisa dehan, konforme benefisiariu sira ninia relatoriu neebe mai husi sira nia familia ou mai husi prizaun ou mai husi entidade nakait konfirma lei indultu nomos ba iha komutasaun de pena nia.
(eme)
