DILI, STLTIMORLESTE.com – Prezidente Republika (PR), Jose Ramos Horta iha ona hanoin hakarak transforma Laklubar sai fatin neebe sai produsaun ba kafee no abukat.
Prezidente Republika Jose Ramos Horta hatoo lia hirak nee ba jornalista sira iha kantina matak Palasiu Prezidensial Nicolau Lobato, Bairo Pite, Kuarta loraik (01/07/2026).
PR hatete, Prezidente rasik iha ona hanoin atu halo projetu boot ida iha Munisipiu Manatutu, liuliu iha area Laklubar sai fatin produsaun kafee nomos abukat.
“Hau iha hanoin atu halo projetu boot ida iha neeba, atu aumenta produsaun kafee atu aumenta produsaun aifuan, aifunan, hau koalia tiha ona ho Primeiru Ministru konaba ida nee, hau la husu orsamentu ba Governu, hau hakarak deit Primeiru Ministru iha bele aranka entaun hau mobiliza apoiu privadu para aumenta produsaun kafee, kuda Cha, cha neebe organiku diak nia, aifunan, aumenta produsaun aifuan hanesan abukat. Abukat nee diak tebes tanba Laklubar no Same mak abukat barak para bele halo esportasaun.
Idea Prezidente Republika nee kleur ona, ADB ajuda Prezidente Republika atu halo projetu nee, agora hein deit oinsa atu implementa, tanba nee PR sei ba koalia ho populasaun sira.
“Projetu ida fali ohin dader hau koalia ona ho Coperativa Cafee Timor (CCT), hau sei fasilita sira haree oinsa hamutuk ho Asosiasaun Cafee Timor (ACT) halo promosaun makaas liu ba kafee, kuda kafee foun hadia kafee tuan sira nee, nee hau koalia beibeik ona maibe hau haree Governu ladun tau matan ba ida nee, kafee nee ba governu hanesan fali buat ida sekundariu,” katak PR Horta.
Xefe Estadu hatete, reuniaun ho primeiru iha Kinta sei koalia ho Primeiru Ministru para oinsa aumenta produsaun kafee, Kakau, tanba CCT sira halo programa diak, no iha Timor ema barak agora halo produsaun ba Vanila nee karun tebes iha merkadu mundial, no CCT komesa ona esporta, no seluk mak pimenta.
Kakau Timor nia bele sai boot kuda hamutuk ho kafee buat seluk Timor bele esporta, Timor bele halo produsaun mos kakau halo kakau Timor nia sai famozu.
“Hau nia idea mak nee, halo Laklubar sai sentru ida produsaun abukat, kafee, tanba kafee iha ona maibe mos ho kafee luak laku ten maibe laos nee deit hau hakarak haree animal neebe iha Laklubar lakon tiha ona hatama fila fali hanesan kakatua, uluk Laklubar barak los agora laiha, Ermera sei iha barak, nomos kuda, tanba Laklubar nee uluk kuda barak los ate ema bolu Laklubar nee kuda ulun hanesan Bobonaro mais agora ladun, kuda Timor nee famozu iha Australia sira halo filme nee kleur ona,” katak PR Horta.
Xefe Estadu hatete, sei haree mos animal sira hanesan Kakatua nomos makikit neebe daudaun nee laiha ona buka hakiak fali, tanba makikit nee importante tebes.
PR Horta hatete, hakarak halo Laklubar sai sentru ida espesial bainhira haree produsaun iha Laklubar diak ona sei halo fali iha munisipiu seluk. No Prezidente nia planu sira nee sei hetan apoiu husi ADB neebe iha Timor Leste.
(eme)
