DILI, STLTIMORLESTE.com – Prezidente Republika (PR), Jose Ramos Horta halo despedida ho Embaixadora Noruega ba Timor Leste, Rut Kruger Giverin, tanba mandatu remata ona iha Timor Leste.
Iha loron Segunda (06/07/2026) Prezidente Republika, Jose Ramos Horta simu vizita kortezia despedida husi Embaixadora Noruega ba Timor Leste, Rut Krüger Giverin, hodi marka konkluzaun ba ninia mandatu diplomatiku tinan lima neebe remata ona hodi fila hikas ba nia rai.
Iha biban nee Embaixadora Noruega ba Timor Leste, Rut Kruger Giverin hatete sente ondradu mai halo enkontru ho Prezidente Republika Jose Ramos Horta, no enkontru nee hanesan enkontru despedida tanba nia mandatu nuudar Embaixadora Noruega ba Timor Leste, remata ona.
Iha sorumutu neebe amigavel, Embaixadora Giverin reflete konaba ninia tempu iha rai laran, hodi elojia dezenvolvimentu kontínua nasaun nian no destaka reziliensia no mos oportunidade barak neebe iha Timor-Leste.
“Parabens ba sua exelensia Prezidente Ramos Horta konaba pasu importante nasaun nian relasiona ho adezaun ba ASEAN,” dehan Embaixadora.
Iha hasoru malu nee Lider nain rua diskute kona-ba prioridade governu atual nian iha bloku rejional nee, no mos preparasaun estratejika ba prezidensia ASEAN Timor-Leste nian neebe sei mai.
Iha enkontru nee Prezidente Republika Jose Ramos Horta fahe ninia vizaun ba projetu Greater Sunrise no futuru ekonomiku nasaun nian. Embaixadora Giverin nota importansia estratejika husi inisiativa nee, hodi fo enfaze ba potensia Timor-Leste nian atu sai ator importante ida iha merkadu enerjia global iha meiu krize enerjia global atual. Hodi remata ninia vizita, Embaixadora sesante hatoo saudasaun kalida husi povu Noruega no hein katak Prezidente no nasaun sei kontinua hetan susesu iha esforsu sira iha nivel nasional no internasional.
Tuir observasaun neebe STL hetan bainhira Embaixadora too iha Palasiu Prezidensial Prezidente Republika Jose Ramos Horta simu ho haksolok no hatoo bemvindo ba Embaixadora neebe mai ona iha Palasiu hodi halo reuniuan, no agradese mos ba Embaixadora ba kolaborasaun serbisu durante mandatu iha Timor Leste.
(eme)
