DILI, STLTIMORLESTE.com – Prezidente Repúblika (PR) Jose Ramos-Horta hato’o ninia sentidu kondolénsia ba Honorável Tun Dr. Mahathir Mohamad, Antigu Primeiru Ministru (PM) Malázia, no ninia família, ba falesimentu ninia amada espoza, Tun Dr. Siti Hasmah Mohamad Ali, ho idade tinan 100.
Iha karta ofisiál kondolénsia nian ne’ebé diriji ba Honorável Tun Dr. Mahathir Mohamad, Antigo Primeiru-Ministru Malázia nian, no família, iha loron 28 fulan-Setembru tinan 2026, Prezidente Ramos-Horta hato’o sentidu kondolénsia husi povu Timor-Leste ba Antigo Primeiru-Ministru no ba família enlutada tomak iha perda dolorozu ida-ne’e.
Iha ninia mensajen, ne’ebe Asesu Tersa (29/09/2026) Prezidente Ramos-Horta hato’o sentidu kondelensia ba familia enlutada.
“Ho tristeza mak ha’u simu notísia kona-ba falesimentu ita-nia amada espoza, Tun Dr. Siti Hasmah Mohamad Ali. Hodi ha’u-nia naran rasik, hodi ha’u-nia família nia naran, no hodi povu Timor-Leste nia naran, ha’u hakarak hato’o ba Exelénsia no ba família enlutada tomak ha’u-nia kondolénsia boot liu iha perda dolorozu ida-ne’e. Tun Dr. Siti Hasmah mak feto ida ho dignidade boot, humanidade, no dedikasaun ba serbisu públiku.”katak PR Horta.
Xefe Estadu hatete Nu’udar feto Malázia dahuluk ida ne’ebé tama iha profisaun médiku, nia dedika nia moris ba saúde públika, ho atensaun partikulár ba saúde inan no labarik no ba moris-di’ak família no komunidade sira-nian.
Durante nia moris estraordináriu, nia mós prezensa konstante no dedikadu iha Exelensia nia sorin, hodi fahe viajen naruk ida ho Malázia no ninia povu sira. Hein katak memória kona-ba moris naruk, laran-luak, no dedikadu hanesan ne’e lori konfortu ba sira hotu ne’ebé iha priviléjiu hodi koñese no hadomi Tun Dr. Siti Hasmah.
Prezidente hato’o ninia simpatia no amizade ne’ebé kle’an liu ba Tun Dr. Mahathir no família Mahathir tomak iha tempu tristeza profunda ida-ne’e, no hato’o orasaun atu Maromak haraik forsa, korajen, no serenidade ba sira hodi hasoru lakon.
(eme)
