DILI, STLTIMORLESTE.com – Prezidente Republika (PR), Jose Ramos Horta espresa profunda tristeza no sinsera solidariedade ba governu no povu Filipina, hafoin rai-nakdoko ho magnitude 7.8 neebe akontese iha Mindanao iha rejiaun sul Filipina nian, iha loron 8 fulan Junhu 2026.
Iha karta ofisial ba Prezidente Republika Filipina, Ferdinand R. Marcos Jr., iha loron tersa 09/06/ 2026, Prezidente Ramos-Horta hatoo nia sentidu kondolensia profunda ba lakon vida, kanek, no estragu material signifikativu neebe kauza husi dezastre nee.
“Hau hakarak hatoo ba Sua Exelensia, ba governu no povu Filipina sira, hau-nia kondolensia profunda no sinsera solidariedade. Hau sei agradese tebes se Sua Exelensia, bele hatoo ba família vítima sira ami-nia sentimentu triste no laran-susar neebe klean liu. Ami mos hatoo ami-nia deseju ba rekuperasaun lalais ba sira hotu neebe hetan kanek no espresa ami-nia solidariedade ba komunidade sira-neebe afetadu husi trajedia ida nee.” dehan PR Horta.
Xefe Estadu hatete Timor-Leste akompanha ho preokupasaun esforsu autoridade Filipina no ekipa resposta emerjensia nian hodi tulun populasaun sira neebe afetadu no restaura normalidade ba area sira neebe hetan impaktu.
Prezidente Ramos-Horta reafirma lasu amizade neebe metin entre nasaun rua nee no espresa konfiansa katak, orientadu husi espíritu reziliensia, korajen, no unidade neebe karakteriza povu Filipina, Filipina sei ultrapasa dezafiu difisil ida-nee.
(eme)
