DILI, STLTIMORLESTE.com – Prezidente Repúblika (PR), José Ramos-Horta hetan akollimentu tradisionál iha Fiji no partisipa iha han-kalan ho Primeiru-Ministru Sitiveni Rabuka.
Tuir komunikadu ne’ebé STL asesu, Tersa (06/10/2026), Prezidente Repúblika José Ramos-Horta simu serimónia akollimentu tradisionál iha Fiji.Serimónia ne’e marka vizita diplomátika Prezidente Ramos-Horta ba Pasífiku, no reafirma relasaun kulturál istórika entre Timor-Leste, Fiji no nasaun Pasífiku sira.
Protokolu kulturál ne’e fó onra ba Xefe Estadu Timor-Leste durante ninia vizita, no hatudu mós ligasaun kulturál entre nasaun Pasífiku sira.
Hafoin serimónia akollimentu, Prezidente Ramos-Horta partisipa iha han-kalan espesiál ne’ebé Primeiru-Ministru Fiji, Sitiveni Rabuka, oferese.
Sorumutu ne’e akontese iha margem eventu simeira pre-COP31, ne’ebé halibur líder Pasífiku no reprezentante internasionál sira iha Nadi.
Han-kalan ne’e sai oportunidade ba diálogu informál kona-ba hametin relasaun bilaterál entre Timor-Leste no Fiji.
Líder rua diskute prioridade dezenvolvimentu komún, kooperasaun rejionál estratéjika no solidariedade entre nasaun Pasífiku sira.
(eme)
