DILI, STLTIMORLESTE.com – Prezidente Republika (PR), Jose Ramos Horta halo enkontru ho estudante sira husi Sudeste Aziatiku koalia konaba Pas no rekonsiliasaun perspetiva ida ba esperiensia husi nasaun sira post konflitu.
Bainhira remata hasoru malu, reprezentante estudante Jezuita, Nadine Liana husi Filipina ba jornalista sira iha Palasiu Prezidensial Nicolau Lobato, Bairo Pite, Kinta (06/08/2026) hatete, ohin mai ekontru ho Prezidente Republika Jose Ramos Horta, hodi rona hanoin konaba esperiensia Prezidente Republika nia iha tempu pasadu rezolve konflitu hodi kria pas no rekonsiliasaun.
“Ohin ami halo enkontru ho Prezidente Republika Jose Ramos Horta, ami husi estudante Jezuita iha Aziatiku mai husi nasaun neebe diferente ho kultura neebe diferente. Iha momentu ida nee mai iha Timor hodi koalia konaba valor dame, no ohin hasoru malu ho sua exelensia Prezidente Republika fahe mos esperiensia durante iha funu laran nomos antes no durante funu oinsa mak Prezidente nia vizaun no pratika iha mediasaun hodi rezolve konflitu no funu liu husi dalan dame nia,” dehan Estudante Nadine.
Nia hatete, rona istoria sira nee sai inspirasaun husi matenek sira neebe fahe liu-liu esperiensia real hodi ultrapasa buat barak iha dame ida no rezolve konflitu nia.
Nia hatete, estudante sira nee mai husi nasaun neebe diferente, mai husi Filipina, Japaun, Indonezia, Tailandia, Xina nomos Timor Leste neebe reprezenta institutu saun João Brito.
Nunee mos Padre Isaias Abilio Caldas husi Jezuita hatutan, sira nee husi kompanhia Sejuita husi nasaun neebe diferente mai halo enkontru ho Prezidente Republika Jose Ramos Horta hodi rona Prezidente nia opinaun ruma liga ho pas no rekonsiliasaun.
“Ami nee komitiva ida husi nasaun neebe la hanesan pertense ba rede boot ida eskola Jezuita nia iha Aziatiku no delegasaun husi Filipina, Indonezia, Xina nomos Timor Leste,” dehan Padre.
Padre dehan, tinan tinan atividade nee lao bolu naran nee desima sesta, durante nee Timor haruka ema sira nee ba liur no tinan kotuk iha enkontru ida iha Xina, Japaun, no Timor sai uma nain ba desima sesta, no tema mak pas no rekonsiliasaun presfektiva ho esperensia iha post konflitu.
“Ita konvida membru husi delegasaun mai iha nee atu pasa semana rua tomak sei aprende, rona, nomos reflete hamutuk ho sira nia grupu konaba pas no rekonsiliasaun husi espriensia Timor nia,” katak Padre.
Padre dehan, sira nee rede Jezuita nia husi Katolika no aprende ona pas no rekonsiliasaun husi igreja nia nomos kompanhia Jesuita no aprende konaba oinsa ho pas no rekonsiliasaun nee hahu baziku oinsa juventude sira nia kontribuisaun ba rekonsiliasaun no dezafiu sira.
Ohin delegasaun nee mai hasoru PR Horta atu rona Prezidente nia esperiensia no refleksaun konaba pas no responsablidade.
Iha hasoru malu nee Prezidente Republika Jose Ramos Horta husu estudante sira kontinua estuda, bele halo demostrasaun maibe tenke halo asaun dame nia tuir dalan lei. Prezidente Rekomenda katak estudante sira bele halo demostrasaun maibe ho dalan dame nia.
Prezidente fahe esperiensia oinsa sai lideransa neebe diak hodi asegura pas no rekonsiliasaun, no Prezidente koalia barak liu konaba mediasaun. Lider tenke iha korajen hodi halo mediasaun iha tempu difisil.
(eme)
