DILI, STLTIMORLESTE.com – Prezidente Republika (PR), Jose Ramos Horta ho Primeiru Ministru (PM) Kay Rala Xanana Gusmão neebe akompanha husi membru governu sira simu vizita ofisial husi Primeiru Ministru Singapura, Lawrence Wong, wainhira too iha Aeroportu Internasional Prezidente Nicolao Lobato.
Governu Timor Leste konsidera vizita ofisial husi Primeiru Ministru, Singapura Lawrence Wong nee importante tebes, tanba ba oin sei hametin liu tan lasu kooperasaun bilateral rai rua nian. No reforsa integrasaun Timor Leste iha rede kooperasaun rejional ASEAN.
“Vizita ofisial durante loron rua, dia 2 too 3 Julhu 2026 ho objetivu atu hametin relasaun bilateral entre Timor Leste ho Singapura, liu-liu iha area kooperasaun ekonomia, investimentu, finansas, edukasaun no dezenvolvimentu institusional,” haktuir nota komunikadu imprensa neebe STL asesu husi media GPM, Kinta (02/07/2026).
Durante vizita, Primeiru Ministru Singapura, Lawrence Wong mos sei halao enkontru bilateral ho Primeiru Ministru Kay Rala Xanana Gusmão hodi deskuti kona ba oportunidade investimentu Singapura iha Timor Leste, hanesan fortalesimentu kapasitasaun institusional no espansaun kooperasaun iha seitor prioridade sira hanesan infraestrutura no dezenvolvimentu sustentavel.
Entretantu Primeiru Ministru Singapura mos sei halao enkontru ofisial ho altas autoridade sira Timor Leste nian hodi diskute mekanizmu konkretu ba implementasaun kooperasaun bilateral neebe iha ona.
(alb)
