DILI, STLTIMORLESTE.com – Prezidente Republika (PR), Jose Ramos husu Governu muda sistema lei eleitoral Prezidensia Republika ho sistema eletroniku, nunee komunidade sira fasil tuir votasaun.
Prezidente Republika Jose Ramos Horta hatoo kestaun nee ba jornalista sira iha Hotel Timor, Kuarta (10/06/2026) husu Governu muda sistema lei eleitoral Prezidensia Republika ho eletroniku nunee hafasil komunidade tuir vota, labele gasta osan too munisipiu foin vota maibe ho sistema eletroniku bele vota iha neebe deit.
“Daudaun Governu preparadu no orsamentu kleur ona, hau hatete sistema nee tenke modernu, hau la simu tan se halo hanesan eleisaun 2022 no 2023, ema neebe rejistu iha Suai, Bobonaro ka iha neebe momentu iha Dili tenke selu transporte too nia fatin hodi vota, diak liu halo kedas ona mudansa, importante iha oras neebe no loron neebe nia iha fatin, ida nee nia bele vota, laos halai fali ba nia aldeia ka suku, nee hau aviza tinan ida liu ba ona,” dehan Prezidente Republika.
Xefe Estadu hatete, se IX Governu liu husi Ministeriu Administrasaun Estratal la muda lei refere no kontinua uza lei anterior iha eleisaun Prezidensial mak Prezidente Republika sei uza nia poder hodi la promulga lei refere.
Prezidente Republika hatete, se bainhira Governu uza nafatin lei anterior halo sidadaun kontinua fila ba nia moris fatin mak tuir votasaun, Prezidente rasik sei la promulga lei ruma. “Se Governu la halo ida nee hau la promulga lei ruma,” dehan Prezidente Republika.
“Too agora hau seidauk haree projetu lei foun ruma, hau hatete Ministru Estatal dala hira ona hau hakarak sistema neebe modernu, diak liu hanesan Brazil nia, numeru um iha mundu eleitor bele iha neebe deit, nia bele iha Timor ka estranjeiru nia vota elekronikamente,” dehan PR Horta.
Xefe Estadu hatete, rede internet agora daudaun diak ona kompara ho tinan hira ba kotuk, tanba nee Prezidente Republika husu Governu eleisaun Prezidensial vota eletronika deit, nunee eleitores iha neebe deit bele vota, la presiza gasta osan too fali nia hela fatin hodi tuir votasaun.
“Rede diak liu agora, duke uluk, klaru ba sira neebe iha foho ai laran neeba bele too iha neeba, maibe hau hatete mak sira neebe iha Dili ka iha neebe la presiza tenke halai fila ba sira nia aldeia para vota, nee uluk akontese problema nee depois kria problema oin oin inkluidu joven sira aproveita husu osan ba partidu ida nee no ida neeba hodi selu transporte husi Dili ba Suai maibe afinal sira la ba too deit Tasi-Tolu,” dehan Prezidente Republika.
Xefe Estadu hatete, nia rekomenda tanba haree ba esperiensia eleisaun prezidensial tinan kotuk sidadaun sira neebe hela iha Dili tenke gasta osan hodi fila fali ba sira nia hela fatin hodi tuir vota, ho ida nee mak Prezidente rekomenda ba Governu muda sistema nee, nunee bele hafasil sidadaun sira neebe hela iha Dili bele vota iha Dili, labele lao ba mai.
(eme)
