DILI, STLTIMORLESTE.com — Prezidente Republika (PR), José Ramos Horta apela tebes ba konsiensia komunidade nian, liu-liu populasaun iha kapital Dili atu para ona soe lixu tun sae ba mota laran, tanba faktu hatudu katak lixu tonelada ba tonelada tun ba tasi komesa oho ona koral no kria venenu ba ekosistema tasi nian.
Prezidente Ramos Horta hatoo kestaun nee liu husi nia diskursu, bainhira marka prezensa iha eventu Desfile no Karavana Loron Nasional “TASI” Ocean Parade neebe halao iha Largo Lecidere, Dili, Sesta (05/06/2026).
“Ita haree, wainhira udan mota tun, lixu lubuk ida, tonelada-tonelada tun husi mota laran sira nee mai iha tasi. Ita hare dadersan saneamentu munisipiu halo limpeza, loraik foer fali ona, tanba populasaun Dili laiha konsiensia, soe lixu oin-oin,” dehan Xefe Estadu liu husi nia diskursu.
Prezidente Horta hateten, sosiedade labele koalia deit katak hadomi tasi no animal sira, maibe hodi fali liman soe lixu ba tasi, tanba nee fo impaktu boot ba futuru ekolojia tasi nian.
“Ita bele koalia hadomi tasi, hadomi animal sira, maibe lixu neebe tun husi mota laran sira nee mai tasi nee, nee oho koral, oho ikan. La kleur venenu boot ba tasi, ita sei lakon koral neebe diak teb-tebes,” Xefe Estadu preokupa.
Iha biban nee, Xefe Estadu mos foti kestaun kona-ba jestaun lixu husi kompanhia sira iha Dili laran neebe lori fali lixu ba fakar iha area Hera, inklui komunidade sira neebe uza oportunidade hodi harii tasi-ibun/kafe iha area Beheda (Metinaro).
“Kompanhia sira neebe iha loja iha Dili ne’e, Primeiru sira ba lori sira nia lixu ba fakar iha Hera neeba. Depois alin sira neeba iha Beheda nee, governu halo estrada luan, fatin kapas los, sira oportunidade halo kafe, sira ba fakar lisu iha kotuk,” PR Horta kkritika.
Prezidente Republika mos kestiona inisiativa husi parte Autoridade Munisipiu Manatuto nian neebe haree mos laiha meius atu foti lixu sira neebe naklekar iha Beheda.
Maske nunee, Xefe Estadu fo kritika makaas ba kestaun lixu, nia mos fo laran-metin no apresia tebes ba eventu OCEANO Parade ne’ebé organiza husi Governu, tanba konsidera eventu nee hanesan edukasaun ida ba povu.
“Eventu nee diak tebe-tebes, furak los, artistiku, bonitu, pedagojiku, hanorin ita kona-ba natureza, hanorin ita kona-ba tasi, ba ambiente, maibe ita hotu-hotu tenke konsiensia, labele soe lixu tun sae,” nia tenik.
Iha sorin seluk, PR Horta la haluha fo agradesimentu ba Primeiru Ministru no Ministru sira neebe responsavel ba organizasaun eventu nee, hodi husu mos ba Xefe Governu atu autoriza hodi sira bele hamutuk haksolok too kalan no dansa hamutuk.
Entretantu, Xefe Estadu mos uza oportunidade nee hodi husu ba sidadaun sira neebe iha kbiit finanseira ka osan atu sosa mos produtu husi inan-aman no juventude sira neebe faan sasan iha area Largo Lecidere hodi apoiu netik sira nia ekonomia familia.
(EST 01)
