DILI, STLTIMORLESTE.com – Prezidente Republika (PR), Jose Ramos Horta husu sidadaun hotu-hotu hametin dame iha selebrasaun Festa Paskua.
Prezidente Republika Jose Ramos Horta hatoo lia hirak nee ba jornalista sira, bainhira remata prezide Meza Redonda iha Palasiu Prezidensial Nicolau Lobato, Bairo Pite, Tersa kalan (31/03/2026).
Prezidente Republika hatete, iha loron hira deit sei selebra festa paskua, tanba nee husu sidadaun hotu-hotu iha Timor laran tomak kontinua hametin dame no haburas pas iha sosiedade nia leet, nunee selebrasaun festa Jesus nia mate no moris hias lao ho hakmatek.
“Loron paskua hotu-hotu hametin liu tan dame iha rai ida nee. Iha Timor diak hela, modelu ida ita kontinua halo esforsu boot para mantein dame iha rai laran,” dehan Prezidente Republika.
Iha biban nee Prezidente Republika hatete, idak-idak nafatin halo esforsu, nunee mantein dame iha rai laran.
Aleinde nee Xefe Estadu hatutan tan katak, nia sei koalia ho ekipa IOI nunee sira sei apoiu Timor Leste liu husi halo Hospital Modernu iha TL.
“Ohin tuku 8 kalan hau sei koalia ho lider IOI, loron ruma liu ba koalia tiha ona, orsida koalia fali tuku 8 kalan ho balun nia telefone delegasaun ida mai iha loron ruma nia laran para haree hospital foun sira sei halo levantamentu apoiu Timor Leste harii hospital modernu ida ho buat hotu-hotu kompletu,” katak PR Horta.
Xefe Estadu hatutan, kalan nee sei koalia ho ekipa refere, nunee semana ida hanesan nee delegasaun too husi EUA.
(eme)
