DILI, STLTIMORLESTE.com – Prezidente Republika (PR), Jose Ramos Horta husu trabalhador Timor oan iha rai liur hanesan Korea, Australia, Japaun, Inglatera no seluk tan nafatin respeita ema nia lei no kultura servisu ho badinas, nunee hetan osan hodi tau matan ba familia.
Prezidente Republika Jose Ramos Horta hatoo kestaun nee ba jornalista sira iha Hotel Timor, Kuarta (10/06/2026) hatete, trabalhador Timor oan iha rai liur nafatin servisu badinas no respeita ema nia lei no kultura, nunee hetan osan hodi sustenta familia no ba aan rasik.
Prezidente hatete, trabalhador Timor oan neebe dadaun nee halao serbisu iha rai liur ida nee oportunidade diak, premeiru ba sira nia familia, tanba osan neebe mak manan iha Japaun, Korea, Inglatera, Australia, no iha rai liur sempre boot liu dukue iha Timor ida nee ajuda tebes familia.
Prezidente Republika hatete osan neebe Trabalhador sira manan iha liur iha Japaun, Korea, Inglatera, Australia, sempre boot liu dukue iha Timor Leste nee normal, sira ajuda sira nia familia sira nia alin, bin ruma ba eskola, osan tama direitamente ba sira, diak liu fali ajuda internasional, tanba ajuda internasional barak liu mak gasta fali ba sira neebe fo osan nee sira mak gasta rasik ho sira nia tekniku sira halo workhop oin oin, maibe sira neebe halao serbisu rai liur lae? ba direitamente ba kada trabalhador nia familia.
“Iha 2025 konforme Banku Central dozentus e des miloens dolar, juta atus rua sanulu resin tama iha Timor mai husi trabalhador sira, nee boot liu ajuda hotu hotu tama direitamente ba familia, nee duni hau kontente ho ida nee hatete deit ba sira, joven sira ba ema nia rai respeita ema nia lei, ema nia kultura, serbisu badinas, serbisu makaas ba o nia familia, ba o nia naran rasik no o nia familia nia naran no rai nia naran,” dehan Prezidente Republika.
Prezidente mos rona imformasaun husi embaixadora TL ba Australia katak kompanha sira iha Australia gosta liu trabalhador Timor oan tanba serbisu badinas, displina.
(eme)
