DILI, STLTIMORLESTE.com – Prezidente Republika (PR), Jose Ramos Horta hatete, nia kondekora artista Calema tanba nia promove Timor Leste liu husi muzika hananu iha Portugal halo ema rihun ba rihun mak rona.
Prezidente Republika Jose Ramos Horta hatoo kestaun nee ba jornalista sira, bainhira remata vizita Traballu ba Singapura no indonezia fila hikas mai Timor Leste iha Aeroportu Internasional Nicolau Lobato, Komoro, Kuarta (03/06/2026).
“Ita halo kondekora tanba rai ida ke ita simu ema hotu hotu sira mai husi dook, mai dala hira ona mai halo promosaun makaas ba Timor, sira nia partisipasaun grupu Calema nee koalia konaba Timor iha Portugal neeba ema juta ba juta mak rona, nee hanesan jestu ida husi ita nia ba sira hanesan mos uluk halo ba grupu timor oan sira neebe kantor I artista oin oin,” dehan Prezidente Republika.
Portantu sira sai hanesan embaixador boa vontade, sira sei halo kampanha liu tan balun too agora seidauk rekoinese tan, tanba iha Portugal nee sei iha ema lubuk ida tinan 20 resin sira apoiu timor makaas, Jornalista ida husi Jornal espresu, Prezidente buka nia maibe foin dadauk mak hetan.
Foin daudaun Prezidente Republika (PR), Jose Ramos Horta kondekora insignia Orden Timor Leste ba artista konhesidu mundial duo Calema.
Prezidente Republika Jose Ramos Horta kondekora Insígnia Orden Timor Leste nian ba Antonio Mendes Ferreira no Fradique Mendes Ferreira, Artista duo Calema neebe konesidu iha nível internasional, nuudar rekonesimentu ba sira nia kontribuisaun notavel ba promosaun lian portugesa no kultura luzofona. Serimonia nee halao iha Palasiu Prezidensial Nicolau Lobato.
Duo Calema simu atribuisaun tuir Dekretu Prezidente Republika Nu. 59/2026, neebe rekonese viajen artístiku Calema nian hodi halibur povu no foin-sae sira husi Komunidade País Lian Portuges (CPLP), hodi hametin lasu amizade no kultural entre Estadu-membru sira.
Calema sai nuudar símbolu kontemporaneu kultural luzofona nian, ho sira-nia muzika neebe lori mensajen unidade, esperansa, no valorizasaun identidade kultural sira. Liuhusi atribuisaun ba Calema, fo onra ba kbiit muzika no lian portuges nian hodi halibur kontinente, jerasaun no kultura sira. Sira nia serbisu iha impaktu pozitivu partikularmente iha Timor Leste, liu-liu entre foin-sae Timor-oan sira, hodi promove sentimentu pertensa ba komunidade lian portuges, sira-nia kontribuisaun hodi hametin lasu kultural ho povu luzofonu sira seluk no hodi promove valor fraternidade, diversidade kultural, no amizade entre povu sira, halo sidadaun ilustre rua-nee merese hetan rekonesimentu no apresiasaun husi Estadu Timor-Leste.
(eme)
