DILI, STLTIMORLESTE.com – Prezidente Republika (PR), Jose Ramos Horta kondekora kolar ordem Timor Leste (TL) ba diplomata, Dino Patti Djalal, iha Palasiu Prezidensial Nicolau Lobato, Bairo Pite.
Prezidente Republika, Jose Ramos Horta sai uma nain ba palestra prezidensial 2026 Serie IV konaba “Embracing The Next World Order” iha eventu nee kondekora diplomata, Dino Patti Djalal
Eventu nee realiza ho Serimonia kondekorasaun Solene Orden Timor Leste nian ba Dr. Dino Patti Djalal, onra aas liu neebe Republika Demokratika Timor-Leste fo, neebe estabelese hodi rekonhese kontribuisaun esepsional sira ba nasaun, nia povu no umanidade.
Liu husi Dekretu Prezidente Republika Nu. 90/2026, Prezidente Ramos Horta kondekora Dr. Dino Patti Djalal ho Kolar Orden Timor Leste nian nuudar rekonhesimentu ba ninia kontribuisaun sira neebe destakadu ba diplomasia rejional, relasaun internasional no kooperasaun pasífika.
“Ami hatoo ami-nia apresiasaun klean ba Dr. Dino Patti Djalal ba ninia servisu nuudar ita-nia Enviadu Espesial ba ASEAN, ba hametin lasu amizade, kooperasaun, no solidariedade entre Timor-Leste no Estadu-membru sira ASEAN nian, ba nia dedikasaun ba nia knaar diplomatiku, no ba ninia esforsu sira hodi haburas relasaun sira neebe besik liutan entre Timor-Leste ho nasaun Sudeste Aziatiku nian sira. Ita mos rekonese ninia kontribuisaun neebe importante hodi promove Timor-Leste nia interese no pozisaun sira iha prosesu integrasaun ASEAN nia laran tomak – liu husi fasilita kontaktu sira, hasae kompriensaun mutuu, no promove kooperasaun rejional. Ita agradese tebes ba ninia servisu,” dehan Prezidente Jose Ramos Horta liu husi nia diskursu iha Palasiu Prezieensial Nicolau Lobato, Bairo Pite, Sesta (14/08/2026).
Diplomata Dino Patti Djalal maka Fundador no Prezidente Komunidade Polítika Esterna Indonezia nian (FPCI), grupu polítika esterna baze nian neebe boot liu iha Indonezia, Sudeste Aziatiku, no Indo-Pasífiku.
Antes nee nia halao knaar nuudar Vise-Ministru Negosiu Estranjeiru Indonezia nian (2014) no Embaixador ba Estadus Unidus (2010–2013). Iha tinan 2004, nia hetan nomeasaun nuudar Assessor Espesial ba Prezidente Susilo Bambang Yudhoyono. ba Asuntu Internasional sira, hodi halao knaar nuudar Portavos Prezidensial, Hakerek-nain ba Diskursu, no Asesor Polítika esterna. Dr. Djalal iha Ph.D. iha Relasaun Internasional husi London School of Economics no nuudar orador proeminente ida kona-ba diplomasia, seguransa, no kooperasaun rejional ho foku makaas ba envolvimentu juventude no diplomasia sidadaun nian, hodi defende papel sosiedade sivíl iha formasaun debate global sira.
Hafoin serimonia kondekorasaun, Dr. Djalal hatoo palestra prinsipal ida kona-ba “Embracing the Next World Order” (Inkorpora Orden Mundial Tuir mai).
Palestra nee ho objetivu atu analiza realineamentu global sira no sira nia impaktu iha Sudeste Aziatiku iha mundu multipolar haburas adaptabilidade estratejiku liuhusi ajuda nasaun sira neebe dezenvolve hela atu harii reziliensia, haforsa poder kmaan, no navega sistema multilateral sira no envolve líder sira iha futuru liuhusi liga ema sira neebe halo polítika, diplomata sira, akademiku sira, no foin-sae sira iha dialogu kona-ba dezafiu global no estratejia nasional sira.
Iha ninia diskursu prinsipal, Dr. Djalal esplora oinsa estadu sira bele adapta ho konstrutivu no forma arkitetura global neebe evolui, hodi sublina imperativu atu simu mudansa estrutural envezde reziste ba sira. Ninia diskusaun kobre pozisionamentu estratejika, solidariedade rejional iha ASEAN nia laran, no papel krítiku husi juventude no akademiku sira iha preparasaun ba orden mundial tuir mai.
“Ita moris iha períodu ida transformasaun klean tebes. Orden mundial antigu muda daudaun, no ita hakat ba ida foun neebe nia forma seidauk define. Dezafiu ida-neebe ita hasoru mak hetan ekilíbriu foun ida laos ida-neebe domina husi poder ida deit, maibe ida neebe harii iha dialogu, kooperasaun no respeitu ba malu. Iha nee maka poder mediu sira iha nia papel importante ida atu halao, no iha neebe hau iha esperansa boot iha jerasaun foin-sae sira,” katak nia.
Nia hatete Orden mundial iha futuru sei laos simplesmente hetan eransa iha oportunidade atu ajuda forma ida nee, inklui hodi imajina oinsa instituisaun sira hanesan Nasoins Unidas bele evolui hodi hasoru realidade sira mundu nian neebe muda hela. No hanoin Maromak nee justu. Nia fo ona ba ema ida-idak rikusoin ida iha talentu, forsa no objetivu uniku ida. Aproveita rikusoin nee, buka ema nia dalan rasik, no uza ida-nee hodi kontribui ba harii mundu neebe ema hakarak moris ba,” deklara Dr. Dino Patti Djalal.
Eventu nee halibur ofisial governu nivel aas sira, ema sira neebe halo polítika, membru Korpu Diplomatiku, akademiku, Estudante no reprezentante juventude sira. Sesaun nee modera husi Embaixador Nelson Santos, Assessor Senior ba Relasaun Internasional no tuir ho segmentu husu no hatan interativu.
(eme)
