DILI, STLTIMORLESTE.com – Prezidente Republika (PR), Jose Ramos Horta kondekora Kolar Ordem Timor Leste ba Embaixador Dato Amarjith hodi rekonhese nia servisu neebe halo durante nee iha Timor Leste.
Iha biban nee Prezidente Republika Jose Ramos Horta liu husi diskursu iha palasiu Prezidensial Nicolau Lobato Bairo Pite kinta (16/04/2026) kongratula ba Embaixador Malazia ba Timor Leste tanba durante nee kontribui makaas ba Timor Leste.
Prezidente Republika hatete, Embaixador Malazia nia mandatu remata ona nuudar embaixador Malazia ba Timor Leste tanba nee Estadu no povu hatoo rekoinesementu ba didikasaun neebe halo durante iha Timor Leste.
“Embaixador, bainhira ita-boot prepara atu sai, ami rekonese laos deit ita-boot nia realizasaun profisional sira, maibe mos laran-manas no vontade diak pesoal neebe ita-boot hatoo ona ba povu Timor-Leste. Hamutuk ho ita-boot nia família, ita-boot sai ona parte ida husi ami nia komunidade, no ba ida-nee, ami agradese tebes,” dehan Prezidente Republika.
Prezidente Republika hatete Malazia sai nafatin hanesan parseiru no belun ida neebe valorizadu ba Timor-Leste. Fundasaun metin neebe embaixador no povu malazia ajuda harii sei kontinua orienta kooperasaun iha tinan sira tuirmai.
“Exelensia, ami agradese ba ita-boot nia servisu, ita-boot nia amizade, no ita-boot nia kontribuisaun sira neebe dura. Ami dezeja ba ita-boot no ita-boot nia família susesu kontinua, saude diak, no ksolok iha ita-boot nia esforsu sira iha futuru. Maromak haraik bensaun ba ita hotu,” hakotu PR Horta.
Iha biban nee Embaixador Malazia ba Timor Leste, Dato Amarjith hatoo sentidu sentidu onra no agradesimentu neebe klean ba Prezidente Republika tanba ohin bele kondekora nia ho Kolar Ordem Timor Leste.
“Uluk nanain hau atu hatoo hau nia apresiasaun klean ba Ita-Boot Exelensia Prezidente Republika ba ospitalidade grasiosa neebe hatoo mai hau, tanba simu despedida ida-nee, no tanba fo mai hau Kolar Orden Timor-Leste nian. Hau sente onradu tebes ho rekonesimentu ida-nee. Nee la pertense ba hau mesak, maibe mos ba hau nia família no kolega sira, neebe sira-nia apoiu sai instrumental hodi hametin lasu bilateral sira entre Malazia no Timor-Leste. Aleinde asuntu ofisial sira no onra distintu ida-nee,” dehan Embaixador.
Embaixador hatoo apresia ba Governu no povu Timor-Leste ba amizade, no apoiu neebe la nakdoko durante nia mandatu tomak.
“Bainhira hau too iha Marsu 2023, hau lori ho hau mandatu ida neebe klaru atu hametin liutan lasu sira amizade no kooperasaun nian entre Malazia no Timor-Leste. Ohin, bainhira hau reflete kona-ba viajen ida-nee, hau sente laran-manas ho progresu signifikativu neebe ita atinji hamutuk,” katak Embaixador.
(eme/EST 1)
