DILI, STLTIMORLESTE.com – Prezidente Republika (PR), Jose Ramos Horta kondekora medalha Ordem Timor Leste ba Sarjentu Xefe Akademia Polisia Perth ba nia servisu neebe halo iha Timor Leste.
Prezidente Republika, Jose Ramos Horta, kondekora Medalha Orden Timor Leste ba Sarjentu-Xefe Akademia Polísia Perth, Timothy Ian Britten, iha serimonia neebe halao iha Palasiu Prezidensial Nicolau Lobato, Sesta (21/08/2026).
Orden Timor Leste mak nasaun nia onra aas liu, neebe fo ba individual sira neebe halao ona servisu esepsional no meritoriu ba nasaun. Sarjentu-Xefe Timothy Ian Britten simu Medalla Orden Timor Leste tuir Dekretu Prezidente Republika Nu. 94/2026, nuudar rekonhesimentu ba ninia servisu distintu ba Timor Leste durante períodu krítiku hafoin restaurasaun independensia nasaun nian.
Sarjentu-Xefe Timothy Ian Britten maka Sarjentu Superior ida iha Polísia Australia Osidental no agora daudaun hanesan ofisial polísia neebe dekoradu liu iha Australia. Nia iha kompromisu kleur ona ba servisu publiku no ba povu rejiaun nian. Nia konesidu iha Australia tanba nia aten-barani durante Bomba Bali iha tinan 2002, neebe akontese bainhira nia iha Bali foti lisensa deskansu no rekreasaun (R&R) husi misaun manutensaun pas nian iha Timor Leste.
Durante atake, nia tama beibeik ba iha area Sari Club neebe estragadu hodi salva ema sira neebe kanek. Tuir mai nia simu premiu The Cross of Valour, Australia nia kondekorasaun ba sivíl aten-barani neebe aas liu. The Cross of Valour mak premiu neebe la naran akontese, Foin Atribuida dala lima iha Australia dezde estabelesimentu sistema kondekorasaun Australianu nian iha tinan 1975. Sarjentu-Xefe Britten nia vizita mai Timor Leste reflete ninia respeitu makaas ba nasaun, ninia povu, no relasaun neebe dura entre Timor Leste no Australia. Servisu ona iha Timor-Leste iha misaun manutensaun pas nian, nia sente onradu atu fila hikas mai Dili no hetan oportunidade atu hasoru malu ho reprezentante sira Timor-Leste nian, inklui Prezidente. Durante nia servisu tomak, Sarjentu-Xefe Britten sai nafatin defensor forte ba korajen, servisu, amizade, no kooperasaun entre komunidade sira iha rejiaun laran tomak.
Liu husi diskursu Prezidente J. Ramos Horta hateten, kondekora ida nee hodi fo ondra ba Sarjentu Xefe Britten.
“Ita fo onra ba Sarjentu Xefe Britten nia destakamentu mai Timor-Leste hanesan parte ida husi Misaun Apoiu Nasoins Unidas nian iha Timor-Leste (UNMISET), hafoin restaurasaun independensia Timor-Leste nian. Durante nia misaun, nia servisu iha komponente polísia Nasoins Unidas nian, asume responsabilidade vital sira iha manutensaun orden publika, aplikasaun lei provizoriu, no apoiu ba dezenvolvimentu no fortalesimentu Polísia Nasional Timor-Leste nian. Sarjentu-Xefe Britten hanesan ponte moris ida entre ita-nia nasaun rua nee.” dehan Prezidente.
Prezidente no povu Timor Leste hatoo sira-nia agradesimentu klean ba Sarjentu-Xefe Britten no reafirma kompromisu Timor-Leste nian atu fortalese relasaun bilateral no kooperasaun internasional hodi buka pas, estabilidade, no dezenvolvimentu.
(eme)
