DILI, STLTIMORLESTE.com – Prezidente Republika (PR), Jose Ramos Horta kondekora kolar Orden Timor Leste ba Esplorador Britaniku Famosu Sir David Hempleman-Adams.
Serimonia kondekorasaun nee halao iha Palasiu Prezidensial Nicolau Lobato, Bairo Pite, Kinta (30/04/2026).
Kondekora Medalha Orden Timor Leste nian ba esplorador, industrial no aventureiru renomadu britaniku, Sir David Hempleman-Adams.
Sir David Hempleman-Adams konhesidu hanesan ema dahuluk neebe too iha Polu Sul Jeografiku no mos iha Polu Magnetiku Norte no Sul. Nomeadu ba nia servisu sira ba esplorasaun, nia lidera ona espedisaun barak ho perfil aas iha ambiente polar no altitude aas, neebe hatudu rezistensia, lideransa no reziliensia neebe esepsional.
Liu husi nia servisu, nia promove dezenvolvimentu foinsae nian, konsiensia ambiental, no valor sira husi perseveransa no jestaun risku neebe disiplinadu. Ninia esperiensia oferese plataforma ida neebe forte atu inspira estudante sira no komunidade sira kona-ba lideransa, reziliensia no responsabilidade ambiental global.
Kondekorasaun ida-nee atribui tuir Dekretu Prezidente Republika No. 47/2026, nuudar rekonesimentu ba esforsu no dedikasaun Sir David nian, neebe fo benefísiu ba sidadaun timoroan lubuk ida iha tinan hirak nia laran.
“Sir David, ita nia moris define husi kurajen, perseveransa no espíritu esplorasaun neebe la rende. Ita-boot fo hanoin mai ami katak la iha limitasaun ba buat neebe ita bele atinji. Ita-nia vizita ba ami nia eskola sira kuda fini ambisaun nian iha ami nia foin-sae sira, hodi hanorin sira katak grandeza laos mai husi privilejiu, maibe husi perseveransa. Hodi povu Timor-Leste nia naran, ami fo onra ba Ita laos deit ba buat neebe Ita hetan ona, maibe ba buat neebe Ita kontinua fo. Hein katak Ita-nia ezemplu bele inspira ami-nia nasaun joven atu bele iha mehi neebe aas liutan, atu perserva ba tempu naruk no atu fiar katak laiha orizonte ida neebe maka ita la bele alkansa,” dehan Prezidente Ramos Horta.
Xefe Estadu hatete, Orden Timor Leste mak nasaun nia onra aas liu, rezerva ba individual sira neebe halao ona servisu esepsional no meritu ba nasaun.
(eme)
