DILI, STLTIMORLESTE.com – Prezidente Republika (PR), Jose Ramos Horta kondekora insignia Orden Timor Leste ba artista konhesidu mundial duo calema.
Iha loron Kinta lokraik (28/05/2026) Prezidente Republika Jose Ramos Horta kondekora Insígnia Orden Timor-Leste nian ba Antonio Mendes Ferreira no Fradique Mendes Ferreira, Artista duo Calema neebe konesidu iha nível internasional, nuudar rekonesimentu ba sira nia kontribuisaun notavel ba promosaun lian portugesa no kultura luzofona. Serimonia nee halao iha Palasiu Prezidensial Nicolau Lobato.
Moris iha São Tome no Prínsipe, Calema hanesan duo dinamiku husi maun-alin Fradique no Antonio Mendes Ferreira. Duo Calema nee sai hanesan forsa ida neebe maka define liu iha muzika luzofona kontemporanea. Inspiradu hosi kosta afrikana nia laloran neebe fo sira-nia naran, Calema kria lian uniku ida neebe kahur ritmu afrikanu sira, pop, no muzika latina, neebe hahu husi cover iha YouTube no programa talentu iha TV ba too fenomenu internasional.
Nuudar kompozitor, autor, no ator, sira produs ona muzika sira neebe duravel hanesan A Nossa Vez Te Amo, Amar pela Metade, no Leva Tudo, neebe hetan vizualizasaun YouTube liu 50 millaun fulan-fulan no asegura fatin #1 iha mundu tomak iha kategoria “Dansa Portuges” iha tinan 2025.
Sira-nia marku istoriku inklui billete neebe faan hotu iha Lisboa nia MEO Arena durante kalan rua, Sai hanesan duo Luzofonu dahuluk neebe halao konsertu iha Paris nia Accor Arena (iha neebe sira fila fali iha tinan 2026), manan Diamond Disc iha Fransa ba “Te Amo” (2024) no iha Junu tinan 2025, halo istoria nuudar artista Luzofonu dahuluk neebe billete sira faan hotu iha Estadio da Luz ho sira-nia naran rasik. Ho ligasaun klean ho diaspora luzofona iha Suisa, Fransa, Luxemburgu, Beljika, Angola, Mosambike, no Azia, no agora habelar ba Kanada no Estadus Unidus, Calema kontinua Eleva muzika lian-portuges ba nivel foun enkuantu metin nafatin iha patrimoniu no enerjia neebe define sira.
Duo Calema simu atribuisaun tuir Dekretu Prezidente Republika Nu. 59/2026, neebe rekonese viajen artístiku Calema nian hodi halibur povu no foin-sae sira husi Komunidade País Lian Portuges (CPLP), hodi hametin lasu amizade no kultural entre Estadu-membru sira.
“Calema sai nuudar símbolu kontemporaneu kultural luzofona nian, ho sira-nia muzika neebe lori mensajen unidade, esperansa, no valorizasaun identidade kultural sira. Liuhusi atribuisaun ba Calema, ita fo onra ba kbiit muzika no lian portuges nian hodi halibur kontinente, jerasaun, no kultura sira. Sira-nia serbisu iha impaktu pozitivu partikularmente iha Timor-Leste, liuliu entre foin-sae Timor-oan sira, hodi promove sentimentu pertensa ba komunidade lian portuges. sira-nia kontribuisaun hodi hametin lasu kultural ho povu luzofonu sira seluk no hodi promove valor fraternidade, diversidade kultural, no amizade entre povu sira, halo sidadaun ilustre rua-nee merese hetan rekonesimentu no apresiasaun husi Estadu Timor-Leste,” deklara Prezidente Jose Ramos Horta.
Calema vizita Timor-Leste ba dahuluk iha tinan 2024, halao konsertu neebe asisti husi Timor-oan rihun ba rihun durante TasiFestival 2024 nian. Calema fila fali mai Timor-Leste ba sira nia aprezentasaun daruak iha TasiFestival tinan 2026. Hanesan parte husi sira-nia vizita, Calema hasoru malu ho Prezidente Ramos-Horta no ofisial governu sira seluk, envolve ho artista lokal Timor-oan sira, no partisipa iha programa kultural espesial iha Dili, TasiFestival, iha neebe sira halo aprezentasaun ba ema lubun ida neebe entuziazmu husi fans Timor-oan sira, Vizita nee hametin liutan ponte kultural entre Timor-Leste no mundu luzofonu em jeral.
Tasi festival nuudar eventu kultural ida-neebe ema barak hein hela iha tinan ida-nee iha Timor-Leste no sei halao iha Tasitolu, Dili, iha loron 29–30 Maiu 2026. Edisaun 2025 hetan susesu boot tebes, atrai partisipante liu 50,000, no eventu tinan ida nee dala ida tan promote esperiensia ida-neebe labele haluha, kombina muzika, kultura, sustentabilidade, no inovasaun. Atrausaun prinsipal ba edisaun 2026 inklui kantor indoneziu konesidu iha mundu Iwan Fals, duo Calema husi São Tome no Prínsipe, kantor angolanu Rui Orlando, no manan-nain husi epoka dahuluk husi Australian Idol iha tinan 2003, Guy Sebastian. kantor muzika no DJ lokal oioin mos sei atua, no artista transformasaun lixu portuges Bordalo II sei lidera komponente workshop arte sustentavel iha festival nee.
(eme)
