DILI, STLTIMORLESTE.com – Prezidente Republika (PR), Jose Ramos Horta kondekora medalha Ordem Timor Leste (TL) ba reprezentante UN Women iha TL.
Prezidente Republika no Laureadu Nobel ba Pas, Jose Ramos Horta, kondekora Medalha Ordem Timor Leste ba Nishtha Satyam, Reprezentante UN Women iha Timor Leste hodi rekoinese nia serbisu neebe halo iha TL.
Orden TL mak nasaun nia onra aas liu, neebe fo ba individual sira neebe halao ona servisu esepsional no meritoriu ba nasaun. Nishtha Satyam simu Medalla Orden Timor Leste tuir dekretu Prezidente Republika No. 93/2026, nuudar rekonesimentu ba ninia dedikasaun, kompromisu, no kontribuisaun sira durante ninia mandatu nuudar Reprezentante UN Women nian iha Timor Leste.
Bainhira remata kondekorasaun Prezidente Republika Jose Ramos Horta ba Jornalista iha Palasiu Prezidensial Nicolau Lobato, Bairo Pite, Sesta kalan (21/08/2026) hatete, Nishtha Satyam husi India tinan barak iha Timor nuudar reprezentante UN Women iha Timor Leste.
“Ita iha relasaun naruk ho Nasoens unidas ajensia sira maibe sra ida nee husi India ema ida diak tebes nia lahalo deit teoria nia buka tulun feto sira,” katak Prezidente Republika Jose Ramos Horta.
Iha biban nee Prezidente Ramos-Horta hatete Nishtha Satyam dezempena papel signifikativu iha promosaun direitu feto, igualdade jeneru, no empoderamentu feto, no hametin partisipasaun feto iha sosiedade Timorense durante ninia misaun nuudar Reprezentante UN Women nian iha Timor Leste.
“Nia kontribui ona ba dezenvolvimentu inisiativa no polítika sira neebe ho objetivu atu avansa igualdade no direitu feto iha ita-nia rain. Ita fo onra ba nia laos deit ba polítika sira neebe nia ajuda forma maibe ba moris sira neebe nia fo impaktu no odamatan sira neebe nia loke ona ba jerasaun feto Timor oan sira iha futuru,” dehan PR Horta.
Prezidente no povu Timor-Leste hatoo sira-nia agradesimentu klean ba Nishtha Satyam ba nia servisu durante tinan hirak-nee no dezeja susesu nafatin ba ninia esforsu sira iha futuru. Rekonhesimentu ida-nee hanesan testamuna ida ba parseria neebe dura entre Timor-Leste no Nasoins Unidas hodi harii sosiedade ida neebe inkluziva no ekuitativa liu ba ema hotu.
Nishtha Satyam hetan nomeasaun nuudar Xefe Eskritoriu ba UN Women iha Timor Leste, entidade Nasoins Unidas nian neebe dedikadu hodi serbisu ba Igualdade Jeneru no Empoderamentu ba Feto iha Setembru 2021. Uluk nuudar eis Adjunta Reprezentante Nasaun nian ba UN Women iha Índia no asumi knaar nuudar Reprezentante Interina iha Índia hahu iha Janeiru 2018. Nuudar feto foinsae ida neebe xefia eskritoriu nasional ida ba UN Women entre nasaun 193, Nishtha Satyam maka feminista ida-neebe la tauk, ekonomista ida neebe hetan formasaun ho interese makaas iha polítika makroekonomika no fiskal aplikada.
Iha nia kareira tempu naruk iha Nasoins Unidas, nia serbisu ona iha Eskritoriu sira UN Women nian, ba grupu nasaun sira neebe diversu iha jeo polítikamente inklui Índia, Butan, Maldivas no Sri Lanka. Nishtha mos asumi ona knaar nuudar Espesialista Parseria Setor Privadu nian ho Gabinete Koordenador Rezidente Nasoins Unidas no UNDP.
Durante nia mandatu nuudar Reprezentante UN Women nian liu tinan lima, Satyam alarga igualdade jeneru husi mandatu Sekretariadu ida deit ba responsabilidade partillada ba ministeriu no instituisaun sanulu-resin ida balun inklui Ministeriu Interior, Sekretaria Estadu ba Protesaun Sivíl, neebe nomeia nia ba premiu ida-nee, PNTL, FFDTL, SEFOPE, no Parlamentu Nasional. Nia lori rigor tekniku no persuasaun pasífiku ba Planu Asaun Nasional daruak konaba Violensia Bazeia ba Jeneru, Planu Asaun Nasional kona-ba Feto, Pas no Seguransa, no Nasaun nian Planu Asaun Nasional dahuluk kona-ba Anti-Trafiku ba ema sira.
Iha nia lideransa, Forsa Polísia Nasional halao ona auditoria jeneru no adota estratejia jeneru dahuluk, no programa governu tomak nian kona-ba orsamentu neebe responde ba jeneru no akompanamentu gastu nian agora hodi garante katak osan neebe kompromete hodi feto sira-nia naran too iha dalan neebe komprovadu hodi fornese ba sira. Legadu polítika nee korresponde ho buat neebe nia harii hamutuk ho feto sira rasik. Nia apoia estabelesimentu Rede Soru Nain, rede dahuluk neebe rejistadu legalmente, agora iha membru 1,000 maka forte, ho rendimentu US$ 200,000 iha tinan kotuk no kontratu diretamente ho governu no tama iha Orsamentu Estadu ba dala uluk iha tinan 2026. Nia apoia feto vendedor ai-han sira ho karrosa sira neebe uza enerjia solar hodi asegura sira-nia produtu no sira-nia fatin iha estrada, forma Estratejia Ekonomia Kuidadu neebe proteje direitu feto sira neebe migrante nuudar traballador ba empregada domestika, hetan rekonesimentu nasional ba feto sira nuudar respondente dahuluk iha dezastre sira, no inkorpora Liga ho Respeitu iha kurríkulu eskolar nasional. Ho rekursu neebe modestu nia hatudu modelu sira mudansa nian neebe funsiona hodi koloka feto Timoroan sira iha sentru istoria nasional nian hanesan agentes ba transformasaun, laos vítima.
(eme)
