DILI, STLTIMORLESTE.com – Prezidente Republika (PR), Jose Ramos Horta kongratula Boxista Timoroan Elidio da Conceição husi klubu Boxe Revolta konsege susesu iha nia kareira iha mundu Boxe, hodi ofrese sintu ida ba Timor Leste bainhira kompete iha kompetisaun X Promotion Boxe iha Bali (Indonezia) semana kotuk.
Prezidente Republika Jose Ramos Horta kongratula Boxista Timoroan Elidio da Conceição bainhira halo enkontru ho Boxista sira iha Palasiu Prezidensial Nicolau Lobato, Bairo Pite, Kinta (15/05/2025).
Iha hasoru malu nee Prezidente husu Boxista sira nafatin prepara aan ho diak, nunee lori Timor Leste nia naran ba mundu liu husi atleta.
Iha biban nee Treinador Revolta, Apolinario Maria Guterres ba jornalista sira hatete, ohin sira marka prezensa iha palasiu prezidensial tanba antes foti ain sai husi rai doben Timor viajen ba Indonezia depois ba iha Fransa hodi mai kompete iha eventu ida nee, hasoru Prezidente, tanba nee ohin remata kontinua mai hatoo obrigadu ba Prezidente.
Treinador dehan, antes sai husi Timor Leste sira mos hasoru malu ho Prezidente Republika Jose Ramos Horta no nuudar sidadaun bainhira hetan vitoria fila hikas mai Timor Leste la haluha mai nafatin iha Palasiu Prezidente hodi hatoo agradese no obrigadu ba Prezidente Republika.
“Antes ami sai, Prezidente nia liafuan neebe fo motiva ami fo hanoin diak hodi ami hetan vitoria mai nasaun,” katak nia.
“Ohin hasoru malu ho Prezidente koalia simples deit, Prezidente fo parabens ba ami, Prezidente hatoo parabens ba ami, nuudar atleta Timoroan ba oin labele para iha nee deit tenke atinji mehi neebe iha,” katak nia.
Nia hatete, husi mensajen neebe Prezidente hatoo ba sira nuudar atleta Timoroan sente kontente no orgulhu ba motivasaun neebe mak hatoo husi Xefe Estadu nuudar aman ba nasaun.
“Mensajen neebe Prezidente hatoo ba ami, ami sente orgulhu no kontente, entaun husi mensajen ida nee motiva tan ami ho espiritu neebe hakarak ba oin lao diak liu tan,” katak nia.
Aleinde nee kona-ba atleta Forlan husi Indonezia nee atleta neebe famozu no segundu lugar ASEAN nia, no Ceo Revolta koalia kona-ba Elidio no forlan nia sei iha prosesu nia laran.
“Ami hein kuandu nia prontu promotor mos dehan ba nia prontu ok iha eventu ruma Elidio bele jogu kontra Forlan,” katak nia.
Nunee mos Boxista Timoroan, Elidio da Conceição alias ‘El-Tiger’ husi klubu Boxe Revolta bainhira joga hasoru adversariu nia ladun tauk, tanba nia mos prepara aan antes liu husi trenu, ”hau mos mai ho trenu, tanba nee buat hotu lao diak no sente normal,” katak nia.
Nunee mos CEO Revolta, Sander Maria Almeida da Costa Serano hatutan, koalia kona-ba eventu ruma nuudar atleta prontu atu kompete iha eventu neebe deit.
Antes nee hetan apoiu ruma husi parte Governu nomos entidade ruma ka lae? Hatan ba kestaun nee CEO Revolta hatete, antes ba hetan apoiu husi Prezidente Republika hodi loke dalan ba sira nunee ba ho diak no ema simu sira mos ho diak.
“Apoiu husi Prezidente Republika loke dalan ba ami lao ho diak no simu ami mos diak, no segundu Visi Primeiru Ministru Francisco Kalbuady Lay, rua nee deit, husi parte Governu mak rua nee deit, ami simu apoiu barak liu boot ba alin Elidio nee ami hetan husi sponsor mai husi setor priadu Metrolin, maun Noky neebe iha inisiativa haree joven neebe iha potensial diak, neebe maun Noky kontaktu ami apoiu ba alin Elidio,” katak nia.
Nia hatete, ba oin buat neebe sira prepara nee oinsa loke dalan ba sira husi ligasaun hodi halo kontaktu husi sponsor hodi haree saida mak atleta sira presiza, maibe kona-ba prepara jogu nee buat hotu depende ba atleta mai husi sira nia aan.
(eme)
