DILI, STLTIMORLESTE.com – Prezidente Republika (PR), Jose Ramos Horta hatete, sente kontente tanba proposta orsamentu retifikativu neebe Governu aprezenta aprova ona iha Parlamentu Nasional, bainhira submete mai meza Prezidente sei taka matan promulga.
Prezidente Republika Jose Ramos Horta hatoo kestaun nee ba jornalista bainhira remata vizita Traballu ba Singapura no Indonezia fila hikas mai Timor Leste iha Aeroportu Internasional Nicolau Lobato, Komoro, Kuarta (03/06/2026).
Prezidente hatete, aprezenta Proposta retifikativu ba Parlamentu nee normal bainhira Governu hasoru situasaun krize ekonomiko mundial.
“Buat ida prosesu normal kuandu Governu imfrenta situasaun krize ekonomiko mundial nee para halo inisiativa balun para proteze konsumidor proteze ita nia ekonomia labele iha impaktu boot liu ba ita nia ekonomia tanba folin hotu hotu sae tenke halo duni retifikasaun nee laos aumenta orsamentu maibe muda tuir lei labele book orsamentu atu book ka muda tenke liu husi parlamentu, hau kontente laiha votu negativu maioria vota afavor balun abstensaun nemos diak maibe pelumenus laiha votu negativu hatudu ke Governu esplika didiak oinsa atu book orsamentu para responde ba situasaun atual,” dehan PR Horta.
Karik orsamentu retifikativu neebe aprova ona iha parlamentu nasional karik lori mai Prezidente Republika sei aprova kalae? Hatan ba kestaun nee Prezidente Republika hatete karik ohin lori mai ohin kedas aprova.
“Ohin lori mai husi nee kedas hau aprova babain mai hau, hau lakohi juridiku sira demora, demora, buat balun se mai hau nia liman hau nein liga tan juridiku sira hau asina kedas,” katak PR Horta.
Iha loron Tersa, Parlamentu Nasional (PN) aprova ona Proposta Lei Orsamentu Retifikativu 2026 iha votasaun final global ba espesialidade ho votu afavor 42, kontra 0 no abstensaun 23, liuhosi sesaun plenaria neebe halao iha sala plenaria Parlamentu Nasional.
Tuir relatoriu finanseiru neebe aprezenta iha plenaria, kategoria salariu no vensimentu, transferensia publika, kapital menor no kapital dezenvolvimentu ba instituisaun publika sira kontinua mantein tuir alokasaun iha orsamentu anterior. Enkuantu nee, mudansa boot liu akontese iha kategoria bens no servisu korrente, neebe influensia diretamente montante orsamentu ba kada instituisaun.
Durante prosesu votasaun ba kada instituisaun, deputadu sira fo sira-nia apoiu hodi aprova proposta alokasaun orsamentu sira, maski bankada opozisaun balu hili atu abstein.
Depois remata votasaun ba kada instituisaun, plenaria kontinua ho votasaun final global ba espesialidade, neebe ikus mai aprova diploma legal nee ho rezultadu votu afavor 42, kontra 0 no abstensaun 23. Proposta Lei Orsamentu Retifikativu 2026 remata ona etapa diskusaun no votasaun iha Parlamentu Nasional, no agora tama ba etapa tuirmai hodi hein promulgasaun husi Prezidente Republika.
(eme)
