DILI, STLTIMORLESTE.com – Prezidente Repúblika (PR), José Ramos Horta hateten, Timor Leste sei kontinua husu Indonézia atu entrega restus mortais Líder Rezisténsia no Herói Nasional Nicolau dos Reis Lobato, maski esforsu diplomátiku no buka-fatin ne’ebé posivelmente hakoi nia restus seidauk hetan rezultadu konkluzivu.
Ramos Horta hato’o deklarasaun ne’e ba jornalista sira iha Centro de Convenções de Díli (CCD), Tersa (25 Agostu 2026), bainhira ensera Simeira Siénsia ba Dezenvolvimentu.
PR Horta hateten, asuntu kona-ba restus mortais Nicolau Lobato nian kleur ona, no Governu Timor Leste halo ona esforsu iha administrasaun Prezidente Indonézia sira liu husi Megawati Soekarnoputri, Susilo Bambang Yudhoyono, Joko Widodo no agora Prezidente Prabowo Subianto.
“Ne’e kleur ona, dezde tempu Megawati Sukarnoputri nia tempu nu’udar Prezidente, Prezidente Susilo Bambang Yudhoyono ho Prezidente Joko Widodo, to’o Prezidente Prabowo. Ami sira ne’e foti desizaun kona-ba kestaun ne’e, maibé to’o agora laiha rezultadu,” dehan Ramos Horta.
Prezidente hatete, nia rasik seidauk hatene ho klaru tanbasá prosesu ne’e seidauk hetan rezultadu, maibé Timor Leste sei kontinua halo esforsu atu hetan restus mortais Nicolau Lobato.
Depois nia hetan posse nu’udar Prezidente Repúblika, Ramos Horta nomeia komisaun ida, inklui Longuinhos Monteiro no Alexandrino, atu buka no investiga informasaun kona-ba posibilidade fatin ne’ebé restus mortais Lobato nian bele hakoi.
Tuir nia, komisaun ne’e halo ona kontaktu no ko’alia ho autoridade militár Indonézia sira, inklui atu haree fatin sira ne’ebé iha suspeita katak bele sai fatin hakoi.
Nia mos hateten katak iha informasaun kona-ba posibilidade restus mortais sira iha simetériu boot ida, maibé seidauk iha konfirmasaun definitiva kona-ba identidade restus mortais sira.
Buka restus mortais Nicolau Lobato nian sai ona asuntu ne’ebé Governu Timor-Leste kontinua lori iha relasaun ho Indonézia. Iha 2023, Ramos Horta mós hateten katak autoridade Timor Leste no Indonézia halo negosiasaun atu buka restus mortais mártir no herói sira ne’ebé mate ka lakon durante okupasaun Indonézia.
Nicolau Lobato ne’ebé konsidera nu’udar Herói Nasional Timor Leste, mate iha tinan 1978 durante luta armada kontra okupasaun Indonézia. Governu Timor Leste no família Lobato kontinua buka klarifikasaun kona-ba destinu nia restus mortais.
Ramos Horta reafirma katak, maski esforsu sira ne’ebé hala’o ona seidauk fó rezultadu, nia sei kontinua husu atu entrega restus mortais Nicolau Lobato nian ba Timor Leste, atu bele fó onra no hakoi nia ho dignidade nu’udar Herói Nasional.
(eme)
