DILI, STLTIMORLESTE.com – Prezidente Republika (PR), Jose Ramos Horta hatete, Prezidensia Republika kontinua buka apoiu komunidade neebe kbiit natoon.
Prezidente Republika Jose Ramos Horta ba jornalista sira iha Palasiu Prezidensial Nikolao Lobato, Bairo Pite, Kinta nee (05/06/2025) hatete, durante nee Prezidensia Republika buka apoiu no halo uma ba komunidade kbiit natoon neebe presiza tebes tulun.
Aleinde nee too oras nee Prezidensia Republika halo uma hira ba komunidade kbiit laek sira, hatan ba kestaun nee Prezidente Republika hatete, nia la konsege kapta numeru hira? Maibe husi Prezidensia Republika kontinua buka apoiu nafatin ba komunidade neebe presiza duni tulun.
“Hau ladun hatene tanba agora daudaun nee 6 ka 7 mak halo daudaun, hau ladun hatene, hau husu lai hau nia staf sira mais halo la para halo ida, rua, tolu, foin daudaun entrega tan balun, balun hau ba entrega staf balun entrega rasik, hau lakohi uma nee prontu ona sira hein fali fulan ida mak entrega entau hau lakohi entrega kedas,” katak PR Horta.
Prezidente Republika hatete, inan aman neebe Prezidensia Republika fo apoiu balun hela iha uma neebe la merese no balun hela iha fatuk koak.
“Sira neebe kiak no kiak liu nee ferik no katuas balun hela iha fatuk kuak, balun hela iha fatin neebe ita labele bolu uma, balun familia kompletu, pai, mae, oan, avo nain 6 nain 7 no nain 10 kondisaun laiha liu, dala ruma hau simu informasaun balun mai husi media balun hau nia staf mak alerta no rona ida nee ohin kedas halo desizaun, sira ba kedas haree,” katak PR Horta.
Prosesu aselera semana ida nia laran buat hotu-hotu despaicha mobiliza ekipamentus, staf ba halo uma, star Prezidensia Republika mak ba halo uma.
“Uma sira nee baibain iha kuartu rua toba fatin rua sala ida, dapur no sintina iha liur ketak, sempre tau mos meza, kadeira, kama kulsaun, buat sira nee hotu no televizaun mos, balun laos ida nee deit maibe halo mos kios ida sosa kedas stok para sira bele moris, se lae bele iha uma bele iha hahan fulan rua fulan tolu pois laiha osan ke tama, balun ajuda kedas loke kios ida,” katak PR Horta.
Prezidente Republika hatutan, apoiu ba inan balun iha Maubara ka Likisa, Prezidente apoiu oinsa bele halo negosiu, ezemplu balun halo negosiu soriso no Prezidente Republika rasik sosa dala hira ona, nunee bele sustenta ba aan no ba familia.
Se lae fo han ohin fulan rua fulan tolu liu laiha ona hahan, maibe husi Ministeriu Solidariedade Sosial mos agora daudaun book aan liu tan ona tulun povu kiik sira neebe presiza tulun.
“Ami iha linha koordenasaun ho Ministeriu Solidariedade Sosial, tanba Governu mak iha mandatu orsamentu no fo apoiu barak liu husi instituisaun estadu, osan nee ba faluk sira, osan ba defisiensia sira, osan ba veteranus no ba terseira idade, purtantu laos deit programa Prezidensial maibe programa neebe estadu no Governu nia boot lao daudaun, liu-liu mak osan ba terseira idade nee US$ 100 kada fulan ba inan no aman iha uma no ajuda seluk tan,” katak Horta.
Nia hatete, apoiu nee laos husi Prezidensia Republika deit ba povu kiik sira neebe presiza tulun maibe governu mos esforsu makaas hodi tulun povu kiik sira, se husi Prezidensia deit la augenta no ida nee mos laos mandatu Prezidensia nia.
(eme)
