DILI, STLTIMORLESTE.com – Prezidente Republika (PR), Jose Ramos Horta halo enkontru ho Koordenadora Jeral ONU iha Timor Leste (TL), Funmi Balogun, diskute hamutuk oinsa halo transformasaun nutrisaun ai-haan iha TL.
Bainhira remata hasoru malu, Koordenadora Jeral ONU iha TL, Funmi Balogun ba jornalista sira iha Palasiu Prezidensial Nicolau Lobato, Bairo Pite, Kinta (18/06/2026) hatete, ohin mai halo audensia ho Prezidente Republika hodi diskute hamutuk oinsa ONU ho Governu Timor Leste atu haforsa nutrisaun ai-haan iha Timor Leste.
“Ohin hau mai halo audensia ho Prezidente Republika Jose Ramos Horta koalia hamutuk konaba saida mak ONU halo iha Timor Leste, aleinde nee ami mos koalia konaba transformasaun ai-haan iha Timor Leste,” dehan Funmi.
Iha biban nee Koordenadora Jeral ONU promete katak sei halo diak liu tan sevisu ONU nia iha Timor Leste, iha area transformasaun ai-haan no melhora liu tan buat sira neebe mak agora daudaun ONU halo hela iha Timor Leste, no enkontru nee laos ohin deit maibe sei iha tan enkontru.
ONU laos atu apoiu orsamentu maibe importante mak haree hamutuk halo oinsa ONU bele ajuda lori rekursu sira nee mai estadu hodi tulun iha area nutrisaun, agrikultura, ai-haan, lori mos setor privadu sira mai servisu hamutuk hodi haree ba asuntu refere.
“Asuntu sira nee mak ohin mai koalia ho Prezidente Republika, parseria ho setor privadu sira liga ho asuntu nutrisaun nia,” dehan nia.
La kleur tan mos sei hasoru kazu el-ninu oinsa husi parte ONU halo kolaborasaun ho Timor Leste hodi halo prevensaun sedu? hatan ba kestaun ida nee reprezentante ONU dehan dadaun nee ONU halo kolaborasaun ho Governu liu husi ministeriu relevante sira halo preparasaun hodi halo prevensaun bainhira akontese el-ninu.
Hatan ba kestaun nee, kordenadora dehan suporta saida mak ONU sei fo ba iha situasaun ida nee mak liu husi haree ba asuntu sira ligasaun ho podcast ba klima nian para haree tok bainhira akontese el-ninu ida nee akontese iha neebe? iha area ida neebe ida nee mak ONU sei fo suporta sei servisu hamutuk ho autoridade relevante liu husi protesaun sivil no mos ministeriu relevante sira oinsa atu bele fo responde kuandu iha duni elnino.
Nia hatutan, daudaun nee ONU ho Governu Timor Leste liu husi ministeriu relevante sira halo hela kolaborasaun no preparasaun hodi haree ba situasaun ida nee.
Nia hatutan, atu reforsa hodi halo preparasaun Reprezentante ONU sei halo enkontru ho Ministeriu relevante sira iha tempu besik nunee haree halo preparasaun hodi koresponde bainhira akontese el-ninu.
Iha biban nee Prezidente Republika (PR), Jose Ramos Horta hatoo bemvindo ba Koordenadora Jeral ONU Iha Timor Leste, Funmi Balogun, hodi hatoo serbisu neebe sira halo hodi apoiu ba Timor Leste.
(eme/EST 1)
