DILI, STLTIMORLESTE.com – Prezidente Republika (PR), Jose Ramos Horta lamenta ho Falesimentu Sekretariu Jeral (SekJer) Sentru Internasional Nizami Ganjavi.
Prezidente Republika Jose Ramos Horta espresa profundu pesar ba falesimentu derepente husi Sr. Rovshan Muradov, Sekretariu Jeral Sentru Internasional Nizami Ganjavi (NGIC), iha Istambul, bainhira halao hela knaar servisu instituisaun nian.
Iha karta kondolensia neebe diriji ba Ko-Prezidente NGIC nian S.E. Vaira Vīķe-Freiberga (Prezidente Letonia nian, tinan 1999–2007) no S.E. Ismail Serageldin Vise-Prezidente Banku Mundial, tinan 1992–2000, ho data Kuarta (09/06/2026) Prezidente Ramos Horta hatoo ninia sentidu kondolensia ba membru no funsionariu sira Sentru nian, no liuliu ba Muradov nia família.
“Permite hau atu hatoo ba Vossa Exelensia sira, ba membru no funsionariu sira husi Sentru Internasional Nizami Ganjavi, no liuliu ba Sr. Muradov nia família, hau nia sinsera kondolensia no sentimenentu solidariedade iha tempu triste ida nee. Hau iha privilejiu hasoru fali Rovshan foin lalais nee iha Forum Global Baku 2026. Hanesan baibain, hau sente impresionadu tebes ho ninia dedikasaun inkansavel, laran-kmanek jenuína, no ninia profundu kompromisu ba misaun Sentru nian. Ninia abilidade uniku atu halibur ema hamutuk, prmove dialogu, no harii ponte entre kultura no perspetiva sira diferente, halo nia sai figura neebe respeita no admira tebes,”dehan Prezidente Republika Horta.
Iha momentu lutu ida nee, Prezidente Ramos Horta hamutuk ho Sentru Internasional Nizami Ganjavi no komunidade internasional hodi fo omenajen ba memoria mane ida neebe nia moris dedika ona hodi serbí ema seluk, haburas komprensaun entre ema sira, no ajuda harii mundu ida-neebe kooperativu liu no orientadu ba dialogu.
Prezidente espresa nia esperansa katak Muradov nia memoria sai nafatin fonte inspirasaun ba sira hotu neebe kontinua misaun nobre neebe nia ajuda halo sai realidade.
(eme)
