DILI, STLTIMORLESTE.com – Prezidente Repúblika (PR), José Ramos Horta hateten, objetivu prinsipál husi Simeira Siénsia ba Dezenvolvimentu la’ós atu lori benefísiu ba líder polítiku sira agora, maibé atu loke oportunidade ba jerasaun foun Timor Leste, liu-liu estudante no joven sira.
Ramos Horta hato’o deklarasaun ne’e ba jornalista sira iha CCD, Tersa (25 Agostu 2026), bainhira ensera Simeira Siénsia ba Dezenvolvimentu.
Nia subliña katak, movimentasaun no organizasaun sientista internasionál sira mai Timor-Leste la’ós atu “lakon tempu”, maibé atu lori siénsia ne’ebé konsidera nu’udar siénsia nível aas liu iha mundu mai hasoru estudante no joven Timor Leste.
“Ne’e la’ós loke oportunidade ba ha’u, ba Maun Xanana, ka Doutor Mari Alkatiri. Ne’e loke ba jerasaun foun,” afirma Ramos Horta.
Nia dehan oportunidade ne’e importante liuliu ba estudante universitáriu no akadémiku jovem sira, tanba sira mak sei kontinua dezenvolve Timor-Leste iha futuru.
Prezidente hateten, Timor Leste mós iha ona parseria ho instituisaun Nobel iha Alemaña no komité sientífiku sira, ne’ebé bele loke oportunidade ba Timoroan sira atu partisipa iha programa internasionál.
Tuir Ramos Horta, akordu ho komité sientífiku permite Timor-Leste atu haruka estudante Timoroan ida ka rua kada tinan ba programa iha área siénsia.
Nia hateten, programa ne’e envolve estudante no joven sira atu hamutuk ho jovem internasionál sira durante semana rua, hodi aumenta esperiénsia no koñesimentu sientífiku.
Prezidente mos temi katak tinan-tinan liu bá ona estudante Timoroan sira partisipa iha programa hanesan ne’e, tanba oportunidade ne’e la’ós foin hahú agora.
Ramos Horta subliña katak, dinamika ida-ne’e tenke kontinua atu kria ligasaun entre jovem Timoroan no komunidade sientífika internasionál.
Nia hateten, Simeira no parseria sientífika sira ne’e bele ajuda Timor-Leste atu aprezenta nia poténsial ba mundu no, iha tempu hanesan, loke dalan ba jerasaun foun atu hetan oportunidade iha edukasaun, peskiza no inovasaun.
Prezidente dehan, liu-liu estudante universitáriu iha área siénsia tenke aproveita oportunidade sira ne’ebé loke liuhusi parseria ho sientista no universidade husi nasaun oioin.
(eme)
