DILI, STLTIMORLESTE.com – Prezidente Republika (PR), Jose Ramos halo enkontru Ministru Estadu Alemanha, Florian Hahn, hodi reafirma ligasaun istoriku no kooperasaun estratejika.
Prezidente Republika Jose Ramos Horta no Ministru Estadu Alemanha, Florian Hahn reafirma Ligasaun Istorika No Kooperasaun Estratejika Iha Dialogu Shangrila.
Iha marjen husi Dialogu IISS ShangriLa ba dala 23 iha Singapura, Prezidente Republika, halao enkontru bilateral neebe amigavel ho Florian Hahn, Ministru Estadu Alemanha iha Ministeriu Negosius Estranjeirus Federal, neebe foka ba aprofunda relasaun kooperasaun entre Timor Leste no Alemanha.
Durante interkambiu nee, Ministru Hahn ho espesífiku husu matenek husi Laureadu Nobel ba Paz nee nia vizaun konaba dinamika seguransa rejional atual iha Azia Pasífiku no ninia perspetiva sira konaba rezolusaun konflitu global.
Hodi hatan, Prezidente Ramos Horta reflete konaba ninia ligasaun pesoal no diplomatika neebe luan ho Alemanha, neebe hahu kedas iha tinan 1980 sira.
Xefe Estadu fahe memoria konaba servisu hamutuk ho kolega Alemaun barak iha dekada hirak nia laran no hatoo apresiasaun klean ba media Alemanha nian.
Prezidente destaka katak, durante Timor Leste nia luta ba ukun rasik aan, jornalista Alemaun sira iha papel krusial hodi publika notísia oioin konaba okupasaun, neebe tulun hodi mantein konsiensia internasional no solidariedade ba kauza timoroan nian.
Enkontru nee mos reforsa kompromisu mutuu neebe konkretu iha palku internasional. Tuir valor demokratiku neebe sira fahe ba malu, Prezidente Ramos Horta reforsa Timor Leste nia apoiu makaas ba Alemana nia kandidatura ba asentu laospermanente iha Konsellu Seguransa Nasoins Unidas. Iha parte seluk, Ministru Hahn afirma Alemana nia apoiu kontínua mai TimorLeste wainhira nasaun nee prepara an ativamente atu asume Prezidensia ASEAN iha tinan 2029, hodi hametin parseiria neebe harii bazeia ba istoria, respeitu mutuu, no vizaun konjunta ba estabilidade global.
(eme)
