DILI, STLTIMORLESTE.com – Prezidente Republika (PR), Jose Ramos Horta hamutuk ho Prezidente Forsa Tarefa Global konaba Protesaun Sosial ba Nutrisaun, organiza lansamentu nasional ba publikasaun Protesaun Sosial ba Seguransa Ai-haan no Nutrisaun Kazu Negosiu.
Serimonia Timor Leste Lansa Kazu Negosiu Global kona-ba Protesaun Sosial Seguransa Ai-han no Nutrisaun halao iha palasiu Prezidensial Nicolau Lobato, Bairo Pite, Kuarta (06/05/2026).
Prezidente Republika Jose Ramos Horta ho Prezidente Forsa Tarefa Global kona-ba Protesaun Sosial ba Nutrisaun, organiza lansamentu nasional ba publikasaun Protesaun Sosial ba Seguransa Ai-han no Nutrisaun Kazu Negosiu ida iha Palasiu Prezidensial Nicolau Lobato.
Eventu nee halibur hamutuk reprezentante governu, parseiru dezenvolvimentu, no parte interesada prinsipal sira atu reflete oinsa protesaun sosial neebe sensivel ba nutrisaun bele avansa prioridade sira Timor-Leste nian iha seguransa ai-han, nutrisaun, dezenvolvimentu kapital umanu no reziliensia.
Dezenvolve ho apoiu tekniku hosi Programa Ai-han Mundial (WFP) no Institutu Estudu Dezenvolvimentu, Kazu Negosiu fornese razaun bazeia ba evidensia ida ba investimentu iha sistema protesaun sosial neebe fo prioridade ba seguransa ai-haan no nutrisaun.
Publikasaun nee inklui liafuan ida husi Prezidente Ramos Horta, neebe nia hateten katak investimentu iha protesaun sosial neebe sensivel ba nutrisaun laos kustu ida, maibe sosiedade ida-neebe matenek liu no justu liu mak bele halo investimentu.
“Investimentu iha ita-nia oan sira-nia saude no nutrisaun sai hanesan baze ba nasaun nia prosperidade no dignidade iha futuru. La iha nasaun ida mak bele dezenvolve ho sustentabilidade bainhira husik sira neebe vulneravel liu iha kotuk,” dehan Prezidente, Jose Ramos Horta.
Relatoriu nee hatudu katak hamlaha no malnutrisaun sei kontinua sai hanesan dezafiu global urjente, neebe afeta labarik, feto no komunidade vulneravel sira. Relatoriu ida nee mos hatete katak seguransa ai-han mesak deit la sufisiente seguransa nutrisaun presiza asesu ba dieta oioin, seguru, no nutritivu, hamutuk ho servisu saude esensial, bee, saneamentu no kuidadu.
Kazu Negosiu ida nee halo argumentu ekonomiku ida neebe forte, hatudu katak kustu global ba la iha asaun ba nutrisaun labarik no inan nian atinji biliãun dolar, enkuantu investimentu neebe dezeña diak iha nutrisaun no protesaun sosial hamosu retornu substansial liu husi populasaun neebe saudavel, ekonomia lokal neebe forte, no produtividade neebe diak liu.
Durante lansamentu nee, Timor-Leste hatudu ninia lideransa nasional no progresu iha protesaun sosial neebe sensivel ba nutrisaun, inklui pilotu Bolsa da Mãe Kondisional SANUTRIO. Kazu Negosiu ida nee hatudu esperiensia Timor-Leste nian iha kaixa 6, “Haforsa Desizaun Politika atu Hadia Protesaun Sosial ba Nutrisaun iha Timor-Leste,” aprezenta SANUTRIO nuudar inisiativa pioneiru ida atu prevene raes badak iha labarik sira tinan tolu mai karik, liu husi liga transferensia osan kondisional ba servisu saude inan no labarik nian no hahan nutritivu espesializadu.
Lidera husi Ministeriu Solidariedade Sosial no Inkluzaun, ho apoiu tekniku husi WFP no parseiru sira, SANUTRIO hatudu oinsa kompromisu polítiku, apoiu doador no parseria estratejika bele transforma protesaun sosial sai mekanizmu ida importante atu hadia nutrisaun, reziliensia no kapital umanu neebe diak liu. Inisiativa nee mos hatudu aprosimasaun bazeia ba evidensia, inklui Proxy Means Test, neebe reflete esforsu Timor Leste nian atu hametin sistema nasional ba uma kain sira neebe vulneravel liu ba nutrisaun.
Eventu ida nee mos reflete kona-ba pasu importante sira foin lalais halao iha Forsa Tarefa Global kona-ba Protesaun Sosial ba Nutrisaun, inklui eventu sira iha Simeira Sosial Mundial nian iha Doha no parseiru sira neebe halo interkambiu iha Pakistaun, iha neebe nasaun sira neebe partisipa fahe esperiensia kona-ba ligasaun protesaun sosial ho nutrisaun inan no oan, monitorizasaun programa no prestasaun servisu.
Liu husi Forsa Tarefa Global kona-ba Protesaun Sosial ba Nutrisaun, Timor Leste promove nasaun neebe lidera advokasia, interkambiu, no kooperasaun Sul-Sul, liu-liu ba Pais sira neebe menus dezenvolvidu, kontestu frajil, no estadu vulneravel sira. Lansamentu nasional marka pasu importante ida hodi liga implementasaun nasional, evidensia global no asaun koletiva hodi apoia Objetivu Dezenvolvimentu Sustentavel 1 no 2.
(eme)
