DILI, STLTIMORLESTE.com – Prezidente Republika (PR), Jose Ramos Horta halo enkontru bilateral ho Prezidente Parlamentu Vanuatu, hodi reafirma lazu amizade nasaun rua iha futuru.
Tuir Komunikadu neebe STL asesu husi media Prezidensia Republika Kinta nee (30/07/2026) hatete, Prezidente Republika, Jose Ramos Horta halao sorumutu kortezia ida ho Prezidente Parlamentu Vanuatu nian, Onoravel Stephen Dorrick Felix Maau Malfes, iha Port Vila durante enkontru lider rua nee reafirma lasu istoriku klean husi amizade no solidariedade neebe hametin Timor Leste no Vanuatu.
Sorumutu nee akontese nuudar parte husi Prezidente nia Vizita Estadu istorika dahuluk, hafoin simu konvite ofisial husi Governu no Povu Vanuatu atu partisipa iha selebrasaun Loron Independensia ba dala 46 nasaun nian iha loron 30 Julhu.
Durante sorumutu nee, lider rua nee reafirma lasu istoriku klean husi amizade no solidariedade neebe hametin Timor-Leste no Vanuatu. Sira reflete kona-ba istoria neebe nasaun rua nee fahe hamutuk, hodi destaka luta komun ba autodeterminasaun, defeza ba soberania nasional, no kompromisu neebe la nakdoko ba pas no demokrasia iha rejiaun Pasífiku.
Vizita ba Parlamentu nee mos fo oportunidade ida atu destaka papel vital husi instituisaun demokratika sira iha konsolidasaun Estadu Direitu no hodi dudu dezenvolvimentu nasional.
Sorumutu istoriku nee hametin liu tan relasaun duradoura entre nasaun rua nee no sublina dedikasaun komun atu hakbesik liutan povu Timor-Leste no Vanuatu nian liuhusi kooperasaun rejional neebe metin liu.
(eme)
