DILI, STLTIMORLESTE.com – Prezidente Republika (PR), Jose Ramos Horta promete sei tau matan ba oan kian nain 5 neebe lakon inan aman iha Aldeia Caco, Suku Sanerin, Postu Administrativu Balibo, Munisípiu Bobonaro.
Tuir informasaun neebe STL asesu husi media Prezidensia Republika, Kuarta nee (12/08/2026) katak, Prezidente Republika Jose Ramos Horta promete sei ajuda oan nain 5 neebe lakon inan aman tutuir malu iha fulan ida nia laran, no oan kiak nain 5 mak hanesan Rosalina da Purificação (tinan 15), Tautiliana da Purificação (tinan 12), Octoviano Maia da Purificação (tinan 10), Aida Maia da Purificação (tinan 4), no Aliança Maia da Purificação, bebe fulan haat.
Alende nee Prezidente Republika Jose Ramos-Horta vizita ba oan-kiak nain-lima nee akontese hafoin oan-kiak sira nee ho inisiativa no karajen haruka direita sira nia vídeo ba Xefe Estadu iha semana liuba hodi husu apoiu umanitariu ba sira nia moris loroloron.
Iha biban nee Prezidente Republika Jose Ramos Horta liu husi nia pajina ofisial hatete ba Oecusse aproveita vizita mos oan kiak neebe hela Palaka.
“Oecusse, Vizita Oan Kiak Nain 5 iha Palaka, fo tulun ba sira,” dehan Prezidente Republika Jose Ramos Horta.
Nunee mos iha semana kotuk bainhira Prezidente Republika simu tiha imforsaun Prezidente Republika orienta kedas Gabinete Unidade Sosiedade Sivíl no Asuntu Sosial Prezidensia Republika, halo vizita direta no observasaun ba família refere nia kondisaun.
Oan kiak nain 5 lakon sira nia inan no aman tuir-tuir malu iha fulan ida nia laran. Inan, Aliança Maia, mate tanba komplikasaun hafoin partu liu husi operasaun, no nia laen, Anselmo da Purificação, mate mos semana ida liu tiha tanba triste tebes no presaun emosional neebe boot. Oan sira-nee, ho tinan husi tinan 15 too bebe ho idade fulan haat, agora dadaun hela hamutuk ho sira-nia avo-feto no tia iha Aldeia Caco, Suku Sanerin.
Iha biban nee oan kiak Rosalina da Purificação, nuudar oan boot husi família refere, husu apoiu husi Prezidente Republika atu ajuda sira nia moris no kontinua sira nia edukasaun.Tanba dadaun nee ema neebe tau matan ba sira nain 5 laiha ona tanba fila hikas ona iha Nain nia kadunan santo rohan laek.
“Ami oan kiak nain-lima husu tulun ba Prezidente ho avo nia laran-luak atu ajuda ami. Ami-nia inan foin mate. Ami husu atu Prezidente bele tau matan ba ami-nia eskola, nesesidade bazika no hatais,” dehan Rosalina.
Atu garante moris-diak família nian ba prazu naruk, Prezidensia Republika liu husi Asesor Prezidensial Quintiliano Moniz hatete sei koopera ho autoridade munisipál no Ministeriu Edukasaun atu garante labarik sira kontinua hetan asesu ba edukasaun no servisu sosial sira.
Prezidente Ramos-Horta mos kompromete an atu kontinua tau matan ba labarik sira nia kondisaun moris, liu-liu ba saude no dezenvolvimentu bebe neebe sei iha fulan haat nian.
Iha vizita nee Prezidente Republika Jose Ramos Horta fahe mos nesesidade baziku hanesan fos mina nomos roupa, no nesesidade seluk tan ba oan kiak nain lima.
(eme)
