DILI, STLTIMORLESTE.com – Prezidente Republika (PR), Jose Ramos Horta sei fo rekonhesimentu ho kondekora Kolar Ordem Timor Leste (TL) ba eis Prezidente Republika Indonezia, Ibu Megawati Soekarno Putri iha TL.
Prezidente Republika, Jose Ramos Horta ba Jornalista sira iha Kantina Matak Palasiu Prezidensial Nicolau Lobato, Bairo Pite Kuarta nee (01/07/2026) hatete, eis Prezidente Republika Indonezia, Ibu Megawati vizita TL iha loron 8-10 fulan Julhu, vizita nee Prezidente sei fo rekonhesimentu hodi kondekora Kolar Ordem TL tanba Ibu Megawati ema neebe importante iha prosesu reformasi, no partisipa direita bainhira TL referendum iha loron 20 Maiu 2002.
“Nee hau hanoin iha dia 9 ou 10 Julhu kondekora ordem TL tanba nia nuudar eis Prezidente Indonezia neebe mai iha ita nia serimonia iha Tasi-Tolu iha 20 Maiu 2002, Ibu Mega hatudu nia sentidu boot estadu nia maske uluk Ibu Mega defende Timor kontinua ho Indonezia ho autonomia iha Indonezia nia laran neebe momentu referendum rezultadu seluk nia ondra rezultadu marka prezensa iha nee iha 20 Maiu 2002 kalan,” dehan Prezidente Republika, Jose Ramos Horta.
Prezidente Republika hatete, nia konvida eis Prezidente Republika mai TL hodi kondekora kolar Ordem TL tanba Ibu Mega mak uluk hahu prosesu reformasi no nia mos marka prezensa bainhira TL hetan referendum iha 20 Maiu 2002.
“Ibu Megawati mos importante tebes ba prosesu reformasi Indonezia, ita temi beibeik Habibie, Habibie mak hahu prosesu reformasi no hahu prosesu referendum iha TL, maibe Ibu Mega mak ho nia forsa nia prestizu primeiru hametin reformasi Indonezia no hametin relasaun ho TL, nee duni mak hau konvida Ibu Mega mai no nia sei mai mos ho nia oan feto neebe assume prezidente DPR Indonezia nia,” dehan PR Horta.
Prezidente Republika hatutan, ho vizita Eis Prezidente Ibu Megawati ho nia oan Prezidente DPR mai TL nee importante oinsa mak bele hametin liu tan relasaun TL ho Indonezia.
“Ibu Mega mai too iha Dili, iha dia 9 Julhu no dia 10 mak fila, programa nakonu iha prezidensia ho Governu, Parlamentu, ho partidu politiku,” katak Prezidente Republika.
(eme)
